अयोध्येतील राम मंदिरातील देणगी घोटाळ्याप्रकरणी विशेष तपास पथकाने (SIT) बुधवारी स्थानिक न्यायालयात 8 आरोपींविरोधात आरोपपत्र दाखल केले. सुमारे 74 हजार पानांच्या या आरोपपत्रात कागदपत्रे, पुरावे आणि अन्य साक्षींचा समावेश आहे. न्यायालयाने हे आरोपपत्र स्वीकारले असल्याची माहिती अयोध्येचे वरिष्ठ पोलीस अधीक्षक गौरव ग्रोवर यांनी दिली. आरोपींविरोधात फौजदारी विश्वासघात आणि भ्रष्टाचार प्रतिबंधक कायद्यासह विविध कलमांनुसार गुन्हा दाखल करण्यात आला आहे.
अटक करण्यात आलेल्या 8 आरोपींमध्ये अविनाश शुक्ला, लवकुश मिश्रा, अनुकल्प मिश्रा, मनीष कुमार यादव, करुणेश पांडे, रामाशंकर मिश्रा, राम शंकर यादव ऊर्फ टिन्नू यादव आणि सुभाष श्रीवास्तव यांचा समावेश आहे. हे सर्व आरोपी सध्या न्यायालयीन कोठडीत आहेत.
CCTV कॅमेऱ्यांमध्ये 105 कथित चोरीच्या घटना
यापूर्वी सोमवारी सॉलिसिटर जनरल तुषार मेहता यांनी सर्वोच्च न्यायालयात SITचा स्थिती अहवाल सादर केला होता. या अहवालानुसार राम मंदिर परिसरातील CCTV कॅमेऱ्यांमध्ये देणगीच्या रोख रकमेशी संबंधित 105 कथित चोरीच्या घटना नोंदल्या गेल्या आहेत. तपासादरम्यान आरोपींविरोधात गोळा करण्यात आलेल्या पुराव्यांचाही अहवालात उल्लेख आहे.
तपासादरम्यान अटक करण्यात आलेल्या 8 आरोपींपैकी 7 जणांकडून पोलिसांनी 79.8 लाख रुपये जप्त केल्याची माहिती सूत्रांनी दिली. मात्र, सुभाष श्रीवास्तव याच्याकडून रोख रक्कम किंवा मौल्यवान वस्तू जप्त करण्यात आलेल्या नाहीत.
25 जूनला FIR दाखल
SITने 25 जून रोजी प्राथमिक तपास अहवाल सरकारकडे सादर केला होता. त्यानंतर दोन दिवसांनी श्री राम जन्मभूमी तीर्थ क्षेत्र ट्रस्टचे सदस्य कृष्ण मोहन यांच्या तक्रारीवरून उत्तर प्रदेश पोलिसांनी FIR दाखल केली होती. प्रकरणाच्या तपासात CCTV फुटेज, साक्षीदारांचे जबाब, आर्थिक व्यवहारांची कागदपत्रे आणि अन्य पुरावे तपासण्यात आले.
दरम्यान, SITने आरोपपत्र दाखल केल्याची माहिती मिळताच बुधवारी मोठ्या संख्येने वकील अयोध्येतील न्यायालयात दाखल झाले. अयोध्या बार असोसिएशनचे अध्यक्ष कालिका प्रसाद मिश्रा यांनी सांगितले की, यापूर्वीच पोलिसांकडे अर्ज करून चंपत राय, अनिल मिश्रा आणि गोपाल राव यांच्या कथित भूमिकेची चौकशी करण्याची मागणी करण्यात आली होती.
त्या वेळी चंपत राय आणि अनिल मिश्रा हे श्री राम जन्मभूमी तीर्थ क्षेत्र ट्रस्टचे पदाधिकारी होते. चंपत राय यांनी आता ट्रस्टच्या महासचिवपदाचा राजीनामा दिला आहे, तर अनिल मिश्रा हे ट्रस्टचे सदस्य होते. गोपाल राव यांना ट्रस्टच्या बैठकींमध्ये विशेष निमंत्रित सदस्य म्हणून बोलावले जात असल्याचे सूत्रांनी सांगितले.
देणगीची रक्कम मोजण्याच्या प्रक्रियेशी आरोपींचा संबंध
या प्रकरणात अटक करण्यात आलेल्या बहुतांश आरोपींचा मंदिरात येणाऱ्या रोख देणगीची मोजणी करण्याच्या कामाशी संबंध होता. सुभाष श्रीवास्तव हा देणगीची रक्कम मोजण्याच्या प्रक्रियेचा प्रभारी होता. टिन्नू यादव हा चालक म्हणून काम करत होता आणि तो चंपत राय यांचा निकटचा सहकारी असल्याचे सांगण्यात आले आहे.
SITच्या तपासानुसार कथित गैरव्यवहार देणगीची रक्कम मोजण्याच्या टप्प्यात झाल्याचे समोर आले आहे. बँकेत रक्कम जमा करण्यासाठी नेण्याच्या प्रक्रियेत गैरव्यवहार झाल्याचा पुरावा आढळला नसल्याचे तपासाशी संबंधित वृत्तांत नमूद करण्यात आले आहे.
दोन आरोपींच्या जामीन अर्जावरील सुनावणी पुढे ढकलली
राम मंदिरातील देणगीच्या कथित चोरीप्रकरणी दोन आरोपींच्या जामीन अर्जावरील सुनावणी बुधवारी पुढे ढकलण्यात आली. पोलिसांनी आरोपपत्र दाखल केल्यानंतर स्थानिक बार असोसिएशनने त्यावर आक्षेप घेतल्याचे आरोपींच्या वकिलांनी सांगितले.
वकील कुलशेखर सिंह यांनी दिलेल्या माहितीनुसार, सुभाष श्रीवास्तव आणि रामाशंकर ऊर्फ टिन्नू यादव यांच्या जामीन अर्जावर आता गुरुवारी सुनावणी होणार आहे.
यापूर्वी सोमवारी विशेष न्यायालयाने अविनाश शुक्ला, मनीष कुमार यादव आणि राम शंकर मिश्रा या तीन आरोपींचे जामीन अर्ज फेटाळले होते. त्यानंतर मंगळवारी अनुकल्प मिश्रा, लवकुश मिश्रा आणि करुणेश पांडे यांच्या जामीन अर्जांनाही न्यायालयाने नकार दिला.
