जपानमध्ये तिरंगा डौलाने फडकावून आशियाई सुवर्णपदकाची लय पकडलेला हिंदुस्थान आता अवघ्या तीन दिवसांत पुन्हा टी-20 च्या रणांगणात उतरणार आहे. पाकिस्तानला नमवून मिळवलेल्या सुवर्णाचा आत्मविश्वास खांद्यावर घेऊन श्रेयस अय्यरच्या नेतृत्वाखाली खेळणारी नवी पिढी लखनौमध्ये वेस्ट इंडिजला भिडणार आहे. पाच सामन्यांच्या या मालिकेत विजयाची लय कायम राखण्यासोबतच ‘सूर्यवंशी’ नावाची नवी धग आंतरराष्ट्रीय क्रिकेटमध्ये आणखी पेटणार का? याचीच उत्सुकता सर्वांना लागलीआहे. विशेष म्हणजे हिंदुस्थानचा टी-20 संघ सलग नऊ सामने अपराजित आहे आणि लखनौत विजयादशमी साजरी करण्याचे ध्येय समोर ठेवले आहे.
लखनौच्या एकाना स्टेडियमवर वेस्ट इंडीजविरुद्ध टी-20 संघर्षासाठी हिंदुस्थान सज्ज आहे. कारण शनिवारी झालेल्या अखेरच्या वन डे सामन्यात पाहुण्यांच्या कामगिरीने मालिकेचा शेवट जोरदार केला होता. त्यामुळे टी-20 क्रिकेटचा फेव्हरेट विंडीज संघ हिंदुस्थानला ‘मुस्कुराइए, आप लखनौ में है’ असे म्हणण्याची संधी देणार नाही, अशा आवेशात आहे. परिणामतः क्षणाक्षणाला रंग बदलणाऱ्या या फॉरमॅटमध्ये कुणाचे नाणे खणखणीत ठरतेय, ते प्रत्यक्ष मैदानात उतरल्यावरच कळेल.
सलामीसाठी सूर्यवंशी बाहेर?
आशियाई क्रीडा स्पर्धेतील संघातील 14 पैकी 12 खेळाडू वेस्ट इंडीजविरुद्धच्या मालिकेसाठीही निवडले गेले आहेत. त्यामुळे पाकिस्तानविरुद्ध सुवर्णपदकासाठी मैदानात उतरलेल्या संघाचेच प्रतिबिंब लखनौमध्ये पाहायला मिळणार. मात्र, सलामीच्या जोडीवरून संघ व्यवस्थापनासमोर पेच निर्माण झाला आहे. आशियाई स्पर्धेत अभिषेक शर्मा आणि वैभव सूर्यवंशी यांनी डावाची सुरुवात केली होती. संजू सॅमसन तिसऱ्या क्रमांकावर आला होता. मात्र, वेस्ट इंडीजविरुद्ध इशान किशनच्या पुनरागमनामुळे या तिघांपैकी दोघांनाच अंतिम अकरात स्थान मिळण्याची शक्यता आहे. अफगाणिस्तानविरुद्धच्या मालिकेत सलग दोन अर्धशतके झळकावणाऱ्या सॅमसनला आणखी एक संधी मिळण्याची शक्यता आहे. त्यामुळे अभिषेकसोबत सॅमसन सलामीला येऊ शकतो आणि इशान तिसऱ्या क्रमांकावर खेळू शकतो.
मधल्या फळीत श्रेयस अय्यर, तिलक वर्मा, शिवम दुबे आणि नितीशकुमार रेड्डी यांच्यावर जबाबदारी असेल. जसप्रीत बुमराला विश्रांती दिल्याने अर्शदीप सिंग वेगवान गोलंदाजीचे नेतृत्व करेल. फिरकीमध्ये कुलदीप यादवला संधी मिळण्याची शक्यता असून, मयंक यादव आणि प्रिन्स यादव यांच्यातील निवडही उत्सुकतेचा विषय ठरेल.
वेस्ट इंडीजकडेही आक्रमक फलंदाजांची फौज आहे. सीपीएलमध्ये धुमाकूळ घालणारा शिमरॉन हेटमायर, रोव्हमन पॉवेल आणि रोमारियो शेफर्ड यांच्यामुळे पॅरेबियन संघाची ताकद वाढली आहे. हिंदुस्थानात मागील दहा टी-20 सामन्यांत केवळ एक विजय मिळवणारा वेस्ट इंडीज हा इतिहास बदलण्याच्या निर्धाराने मैदानात उतरेल.
हिंदुस्थानचा संभाव्य संघ ः अभिषेक शर्मा, संजू सॅमसन, इशान किशन (यष्टीरक्षक), श्रेयस अय्यर (कर्णधार), तिलक वर्मा, शिवम दुबे, नितीशकुमार रेड्डी, अक्षर पटेल, कुलदीप यादव, मयंक यादव/प्रिन्स यादव, अर्शदीप सिंग.
वेस्ट इंडीजचा संभाव्य संघ ः शे होप (कर्णधार/यष्टीरक्षक), कामिल पूरन, शिमरॉन हेटमायर, रोव्हमन पॉवेल, शरफेन रदरफोर्ड, रोमारियो शेफर्ड, शमार स्प्रिंगर, अकील हुसेन, गुडाकेश मोती, शमार जोसेफ, मॅथ्यू फोर्ड.
