राज्यामध्ये ईडीचे सरकार आल्यानंतर मंत्री व अधिकाऱ्यांनी वेगवेगळ्या प्रकारचे निर्णय घेण्याससुरुवात केली आहे. त्याची प्रचिती नगर जिल्ह्यामध्ये आली असून राज्याचे महसूल मंत्री राधाकृष्ण विखे यांची परवानगी घेतल्याशिवाय पदाधिकारी यांनी कार्यक्रमाचे आयोजन करू नये, अशा प्रकारचे आदेश नगर जिल्ह्याचे जिल्हाधिकारी डॉक्टर राजेंद्र भोसले यांनी दिले आहेत. दरम्यान अशा आदेशामुळे आता जिल्ह्यामध्ये पालकमंत्र्यांना विचारल्याशिवाय कोणताच कार्यक्रम होणार नाही, असे आता एकप्रकारे अधोरेखित झाले आहे.
राज्यामध्ये ईडीचे सरकार आल्यानंतर वेगवेगळ्या प्रकारचे निर्णय घेण्यास सुरुवात झाली आहे. नगर व सोलापूर जिल्ह्याचे पालकमंत्री पद हे राज्याचे महसूल मंत्री यांच्याकडे देण्यात आलेले आहे. राधाकृष्ण विखे यांनी नगरमध्ये दोन बैठका या अगोदर घेतलेल्या आहेत, तर सोलापूर येथे सुद्धा त्यांनी जिल्हा नियोजनाची बैठक घेतलेली आहे. राधाकृष्ण विखे यांनी प्रशासनाला एक नियमावली तयार करण्याचे आदेश दिले आहेत. त्यानुसार जिल्हाधिकारी भोसले यांनी याबाबतचे आदेश नुकतेच काढले आहेत.
यामध्ये जिल्ह्यात शासकीय कार्यक्रम समारंभ असेल त्या वेळी पालकमंत्र्यांनाही सदर कार्यक्रमास आमंत्रित करावे. तसेच सदर कार्यक्रमाच्या निमंत्रण पत्रिकेवर पालकमंत्री यांचे नाव योग्य प्रकारे छापण्यात यावे व समारंभांचे वेळी त्यांना आदराचे स्थान देऊन त्यांची व्यासपिठावरील बैठक व्यवस्था राजशिष्टाचाराप्रमाणे करण्यात यावी. तसेच जिल्ह्यातील सर्व केंद्रीय मंत्री, राज्यातील अहमदनगर जिल्हयातील सर्व मंत्री यांनाही योग्य ती पूर्वसूचना देऊन आमंत्रित करण्यात यावे. त्यांना विश्वासात घेऊन से कार्यक्रमास उपस्थित राहणार किंवा कसे याची खातरजमा करून समारंभाच्या निमंत्रण पत्रिकेवर त्यांचे नाव योग्य प्रकारे छापण्यात यावे, असे नमूद आहे. तरी मंत्री, महसूल, पशुसंवर्धन व दुग्ध विकास, महाराष्ट्र राज्य तथा पालकमंत्री नगर यांनी जिल्हा नियोजन समितीच्या बैठकीमध्ये नगर जिल्ह्यात शासकीय कार्यक्रम अथवा समारंभ असेल त्या कार्यक्रमास शासकीय निधीतून होणाऱ्या कामांचे भूमिपूजन, उद्घाटन यांचे आयोजन करण्यापूर्वी पालकमंत्रीची पूर्व परवानगी घेण्याबाबत निर्देश दिले आहेत.
आपल्या विभागातील कोणातही शासकीय कार्यक्रम घेण्यापूर्वी पालकमंत्री कार्यालयाकडून पूर्वपरवानगी घेण्यात यावी तद्नंतरच कार्यक्रमाचे नियोजन करावे. अन्य कोणत्याही पदाधिकारी यांनी पूर्वपरवानगीशिवाय कार्यक्रमाचे आयोजन केल्यास योग्य ती कारवाई करावी, असे दिलेल्या आदेशामध्ये नमुद आहे. दरम्यान जिल्ह्यामध्ये सध्या भारतीय जनता पार्टीच्या माध्यमातून विविध कार्यक्रमांचे आयोजन केले जात असते. या कार्यक्रमाच्या संदर्भामध्ये बहुदा काही गंभीर अशा त्रुटी निदर्शनास आल्या असाव्यात, म्हणूनच बहुदा असा निर्णय घेतला की काय, अशी चर्चा भाजपच्या कार्यकर्त्यांमध्ये सुरू होती.
