उत्तर-मध्य मुंबई लोकसभा मतदारसंघातून कॉँग्रेसने मुंबई कॉँग्रेसच्या अध्यक्षा वर्षा गायकवाड यांना उमेदवारी जाहीर केली आहे. लोकसभा निवडणुकीच्या पाचव्या टप्प्यासाठी उद्यापासून उमेदवारी अर्ज भरण्यास सुरुवात होणार आहे. या पार्श्वभूमीवर वर्षा गायकवाड यांच्या उमेदवारीची घोषणा अखिल भारतीय कॉँग्रेस कमिटीकडून करण्यात आली आहे.
महाविकास आघाडीच्या जागावाटपात उत्तर-मध्य मुंबई आणि उत्तर मुंबई हे दोन मतदारसंघ कॉँग्रेसच्या वाटय़ाला आले आहेत. यापैकी उत्तर-मध्य मुंबईसाठी वर्षा गायकवाड, नसीम खान, भाई जगताप यांच्या नावाची चर्चा होती. अखेर गायकवाड यांच्या उमेदवारीवर कॉँग्रेसकडून शिक्कामोर्तब करण्यात आले आहे.
