स्पेनने फिफा विश्वचषकाच्या अंतिम सामन्यात अर्जेंटिनाला 1-0 ने हरवून इतिहास रचला, पण अमेरिकेचे राष्ट्राध्यक्ष डोनाल्ड ट्रम्प यांनी एका नको असलेल्या पाहुण्याप्रमाणे मंचावर घुसून या विजयोत्सवाला पूर्णपणे गालबोट लावले. ट्रम्प यांच्या प्रसिद्धीलोलुप वागणुकीमुळे जगभरातील फुटबॉल चाहते संतप्त झाले आहेत. चाहत्यांनी त्यांच्यावर प्रसिद्धी मिळवण्याच्या नादात स्पॅनिश संघाच्या विजयोत्सवाला गालबोट लावल्याचा आरोप केला आहे. त्यामुळे ट्रम्प यांच्यावर सर्वात मोठी नामुष्कीची वेळी आली आहे.
स्पेनच्या विजयोत्सवाला गालबोट
स्पेनच्या विजयानंतर अमेरिकेचे राष्ट्राध्यक्ष ट्रम्प ट्रॉफी प्रदान करण्यासाठी आले. पण ट्रॉफी दिल्यावर ट्रम्प मंचावरच थांबले आणि त्यांनी स्पॅनिश खेळाडूंचा ऐतिहासिक विजयोत्सव पूर्णपणे उधळून लावण्याचा प्रयत्न केला.
फिफा अध्यक्षांनी बाहेर काढले…
स्पेनचा कर्णधार रोड्रीला ट्रॉफी प्रदान केल्यानंतर संघ जल्लोष सुरू होण्याची वाट पाहत होता, पण ट्रम्प खेळाडूंच्या बाजूलाच उभे राहिले. परिस्थिती इतकी अस्वस्थ करणारी झाली की, फिफा अध्यक्ष जियानी इन्फँटिनो यांना स्वतः हस्तक्षेप करून त्यांना जाण्याचा इशारा करावा लागला. अखेरीस इन्फँटिनो यांनी ट्रम्प यांच्याकडे जाऊन त्यांना बाहेर काढले.
ट्रम्प यांनी स्पेनच्या जल्लोषात व्यत्यय आणला…
जेव्हा स्पेनने ट्रॉफी हवेत उंचावली तेव्हा ट्रम्प तिथे इन्फँटिनो यांच्याशी गप्पा मारत उभे होते, ज्यामुळे ते छायाचित्रकार आणि खेळाडूंच्या ऐतिहासिक विजयी छायाचित्राच्या फ्रेममध्ये नकोसे पाहुणे बनले. चेल्सीने 2025 च्या क्लब वर्ल्ड कपचा अंतिम सामना जिंकल्यानंतर ट्रम्प यांनी असेच कृत्य केले होते याची आठवण लोकांना पुन्हा एकदा झाली आहे.
ट्रम्प जागेवरून हटले नाहीत
मेक्सिकोचे राष्ट्राध्यक्ष आणि कॅनडाचे पंतप्रधान यांच्यासारखे पाहुणे ट्रॉफी प्रदान केल्यानंतर लगेचच मंचावरून निघून गेले, परंतु ट्रम्प पदक आणि ट्रॉफी प्रदान केल्यानंतरही मंचावरच थांबले आणि मुद्दामहून चित्रीकरण व कॅमेऱ्यात कैद होण्याचा प्रयत्न करत होते.
