मासे हे प्रथिने, ओमेगा-3 फॅटी अॅसिड, व्हिटॅमिन डी आणि शरीरासाठी आवश्यक असलेल्या अनेक पोषक घटकांचा उत्तम स्रोत मानले जातात. नियमित प्रमाणात माशांचे सेवन केल्यास हृदय, मेंदू आणि हाडांच्या आरोग्यास फायदा होऊ शकतो. मात्र, शिळे किंवा खराब मासे खाल्ल्यास फूड पॉइझनिंग, उलट्या, जुलाब, पोटदुखी आणि इतर संसर्गजन्य तक्रारी उद्भवू शकतात. त्यामुळे मासे खरेदी करताना त्यांचा ताजेपणा तपासणे अत्यंत महत्त्वाचे आहे.
तज्ज्ञांच्या मते, ताज्या माशांचे डोळे स्वच्छ, चमकदार आणि किंचित बाहेर आलेले असतात. डोळे धूसर, पांढरे किंवा खोल गेलेले दिसत असतील तर तो मासा शिळा असण्याची शक्यता असते. त्याचप्रमाणे माशांचे कल्ले (गिल्स) गडद लाल किंवा गुलाबी रंगाचे असावेत. ते फिकट, तपकिरी किंवा चिकट दिसत असतील तर असे मासे खरेदी टाळावेत.
माशांचा वासही ताजेपणा ओळखण्याचा महत्त्वाचा निकष आहे. ताज्या माशांना समुद्र किंवा नदीसारखा सौम्य नैसर्गिक वास येतो. मात्र, तीव्र कुबट किंवा अमोनियासारखा वास येत असल्यास तो मासा खराब झालेला असू शकतो. तसेच माशाच्या मांसावर हलके दाब दिल्यानंतर ते लगेच पूर्ववत झाले पाहिजे. दाबाचा ठसा कायम राहिला किंवा मांस खूप मऊ वाटले, तर तो मासा ताजा नसण्याची शक्यता असते.
याशिवाय, ताज्या माशांची त्वचा चमकदार असते आणि खवले घट्ट चिकटलेले असतात. मासे नेहमी स्वच्छ आणि विश्वासार्ह विक्रेत्याकडूनच खरेदी करावेत. बर्फाशिवाय बराच वेळ ठेवलेले मासे घेणे टाळावे. पॅकबंद मासे घेताना एक्सपायरी डेट, पॅकेजिंग आणि साठवणुकीची माहिती तपासणेही आवश्यक आहे. या साध्या गोष्टी लक्षात ठेवल्यास फूड पॉइझनिंगचा धोका कमी होऊ शकतो.
