कन्हेरी येथे शुक्रवारी आयोजित सभेत त्यांच्याकडून कुटुंब कसे एकत्रित आहे हे दाखविण्याचा प्रयत्न झाला. अगदी अमेरिकेतून पत्रकार तेथे आणले, असा आरोप उपमुख्यमंत्री अजित पवार यांनी केला होता. त्यांचा हा आरोप हास्यास्पद असल्याचे मत खासदार सुप्रिया सुळे यांनी व्यक्त केले.
बारामतीत त्या पत्रकारांशी बोलत होत्या. सुळेंच्या पुस्तिकेतील अनेक विकासकामे मीच केली असल्याचे अजित पवार म्हणाले होते, त्यावर सुळे म्हणाल्या, ‘त्यावेळी सगळा पक्ष एकच होता. सगळे एकत्रच होते. माझ्याकडे केंद्राच्या योजनांची जबाबदारी होती. पालकमंत्री, उपमुख्यमंत्री, अर्थमंत्री तसेच लोकसभा मतदारसंघातील विविध आमदारांसोबत मी एकत्रित काम केले. त्यामुळे निधीवाटप म्हणजे ‘ताटातील वाटीत.. आणि वाटीतील ताटात’ असा तो प्रकार होता.
