उत्तराखंडमध्ये सततच्या मुसळधार पावसामुळे जनजीवन विस्कळीत झाले आहे. पावसामुळे अनेक भागांमध्ये भूस्खलन आणि रस्ते खचण्याच्या घटना घडल्या आहेत. यमुनोत्री राष्ट्रीय महामार्गाला सर्वाधिक फटका बसला असून, उत्तरकाशी जिल्ह्यातील स्यूनचट्टीजवळ सुमारे 100 मीटर रस्ता वाहून गेला आहे. एसडीआरएफने अडकलेल्या सुमारे 100 यात्रेकरूंना दोरीच्या साहाय्याने वाचवले.
टीव्ही 9 भारतवर्षने दिलेल्या वृत्तानुसार, गुरुवारी मुसळधार पावसामुळे झालेल्या भूस्खलनामुळे स्यूनचट्टी परिसरात महामार्ग पूर्णपणे बंद झाला. रस्ता वाहून गेल्यामुळे, बचाव पथकांनी पायी चालण्याचा पर्यायी मार्ग तयार करत दोरीच्या सहाय्याने यात्रेकरूंना सुरक्षित ठिकाणी हलवले. बचाव आणि मदत कार्यादरम्यान विशेष सुरक्षा व्यवस्था करण्यात आली होती. यमुनोत्री महामार्ग गेल्या दोन दिवसांपासून बंद असून, रस्त्याच्या दुरुस्तीचे काम सुरू आहे. मुसळधार पाऊस आणि डोंगरावरून सतत होणाऱ्या दगड आणि ढिगाऱ्यांमुळे दुरुस्ती कामात अडथळा येत आहे.
उत्तरकाशीचे जिल्हाधिकारी प्रशांत आर्य यांनी शनिवारी बाधित भागाची पाहणी केली. अधिकाऱ्यांना पर्यायी मार्गाचे बांधकाम लवकरात लवकर पूर्ण करण्याचे निर्देश दिले. राष्ट्रीय महामार्ग विभागाच्या अधिकाऱ्यांना स्यूनचट्टी येथील यमुना नदीवरील पुलाचे बांधकाम एका आठवड्यात पूर्ण करण्याचे निर्देशही दिले.
ऋषिकेश-केदारनाथ राष्ट्रीय महामार्ग बंद
राज्य आपत्कालीन कार्य संचालन केंद्रानुसार (SEOC), रुद्रप्रयाग जिल्ह्यातील सिरोबागरजवळ ढिगाऱ्यांमुळे ऋषिकेश-केदारनाथ राष्ट्रीय महामार्गही बंद आहे. पौरी जिल्ह्यातील कोटद्वार-सातपुली राष्ट्रीय महामार्गावर वाहतूक विस्कळीत झाली आहे. युद्धपातळीवर ढिगारा हटवण्याचे काम सुरू आहे. दरम्यान, शुक्रवारी रात्री उशिरा गुमखाल-सातपुली रस्त्यावर झालेल्या भूस्खलनात भाजीपाला घेऊन जाणारा एक पिकअप ट्रक खराब झाला. मात्र, चालक आणि वाहनातील तिन्ही प्रवासी सुखरूप बचावले.
पुढील 24 तासांसाठी मुसळधार पावसाचा इशारा
हवामान विभागाच्या माहितीनुसार, गेल्या 24 तासांत राज्यातील अनेक भागांमध्ये मुसळधार पावसाची नोंद झाली आहे. कीर्तिनगरमध्ये सर्वाधिक 135 मिमी पावसाची नोंद झाली, तर सातपुली, लोहारखेत, यमेश्वर, सोंग, पोखरी आणि इतर डोंगराळ भागांमध्येही मुसळधार पाऊस झाला. हवामान विभागाने पुढील काही दिवसांसाठी मुसळधार पाऊस आणि भूस्खलनाचा इशारा दिला असून, लोकांना सतर्क राहण्याचा सल्ला दिला आहे.
