महाराष्ट्र लोकसेवा आयोगामार्फत रविवार 29 ऑक्टोबर रोजी पोलीस उपनिरीक्षकपदासाठी परीक्षा घेण्यात येणार आहे. परंतु त्याच दिवशी नगरपरिषद भरती परीक्षा आणि महाज्योती मार्फत केंद्रीय लोकसेवा आयोग प्रशिक्षणार्थ्यांसाठीची परीक्षा देखील घेण्यात येणार आहे. अशा प्रकारे तिन्ही परीक्षा एकाच दिवशी घेण्यात आल्यामुळे परीक्षार्थींना 2 परीक्षांना मुकावे लागणार आहे. या पार्श्वभूमीवर पोलीस उपनिरीक्षक पदासाठीच्या परीक्षेच्या वेळापत्रकात बदल करण्यात यावा, अशी मागणी शिवसेना (उद्धव बाळासाहेब ठाकरे) आमदार विलास पोतनीस यांनी महाराष्ट्र लोकसेवा आयोग तसेच मुख्यमंत्र्यांकडे निवेदनाद्वारे केली आहे.
स्पर्धा परीक्षांचा अभ्यास करून सरकारी अधिकारी होण्याचे स्वप्न उराशी बाळगून अनेक परीक्षार्थी रात्रंदिवस मेहनत करतात. त्यासाठी राज्य व केंद्र शासनाच्या विभागाकडून जाहीर करण्यात असलेल्या प्रत्येक स्पर्धा परीक्षांचा अर्ज एक संधी म्हणून लाखो परीक्षार्थी भरतात. परंतु या स्पर्धा परीक्षांच्या तारखा एकाच दिवशी आल्यास परीक्षार्थींना केवळ एकाच स्पर्धा परीक्षेला सामोरे जाता येते. 29 ऑक्टोबर रोजी या तिन्ही परीक्षा एकत्र होणार असल्याने विद्यार्थी संभ्रमात पडले आहेत. त्यामुळे या परीक्षार्थींसमोर निर्माण झालेला या परिस्थितीचा सहानुभूतीपूर्वक विचार करून 29 ऑक्टोबर रोजी महाराष्ट्र लोकसेवा आयोगामार्फत घेण्यात येणाऱ्या पोलीस उपनिरीक्षक पदासाठी आणि नगरपरिषद परिषद भरतीच्या परीक्षेचे वेळापत्रक बदलण्यात यावे, अशी मागणी आमदार विलास पोतनीस यांनी केली आहे.
