त्रिपुराचे पोलीस महासंचालक अनुराग धनकड यांचा आगरतळा येथील पोलीस मुख्यालयात संशयास्पद परिस्थितीत मृत्यू झाला आहे. सोमवारी दुपारी पोलीस मुख्यालयात रक्ताच्या थारोळ्यात आढळलेल्या अनुराग धनकड यांना तातडीने आगरतळा येथील गोविंद वल्लभ पंत रुग्णालयात नेण्यात आले. मात्र उपचारांपूर्वीच त्यांचा मृत्यू झाल्याचे डॉक्टरांनी सांगितले.
शवविच्छेदन अहवाल आल्यानंतरच त्यांच्या मृत्यूचे नेमके कारण स्पष्ट होईल, असेही डॉक्टरांनी सांगितले. अनुराग धनकड हे 1994 च्या बॅचचे आयपीएस अधिकारी होते. मे 2025 मध्ये त्यांनी त्रिपुराच्या पोलीस महासंचालकपदाची सूत्रे हाती घेतली होती. आपल्या 30 वर्षांच्या प्रदीर्घ सेवाकाळात त्यांनी अनेक आव्हानात्मक जबाबदाऱ्या यशस्वीपणे पार पाडल्या. सीबीआयमध्ये असताना नीरव मोदी घोटाळ्याच्या तपासात त्यांनी अत्यंत महत्त्वाची सेवा बजावली आहे.
