ओडिशातील जंगलात आढळून आलेल्या पाच ऑरंगुटानच्या पिल्लांना त्यांच्या नैसर्गिक अधिवास असलेल्या इंडोनेशियात परत पाठवण्यासाठी प्रयत्न सुरू झाले आहेत. ही पिल्ले त्यांच्या नैसर्गिक अधिवासापासून हजारो किलोमीटर दूर हिंदुस्थानात कशी पोहोचली, याचा तपास सुरू असून, त्यामागे आंतरराष्ट्रीय वन्यजीव तस्करीचे जाळे असल्याचा संशय व्यक्त केला जात आहे.
बालासोर जिल्ह्यातील जलेश्वर रेंजमध्ये ८ सप्टेंबर रोजी वन विभागाचे अधिकारी गस्त घालत असताना ही पाच पिल्ले आढळून आली. त्यांचे वय अंदाजे एक ते दीड वर्षांच्या दरम्यान असल्याचे मानले जात आहे. सध्या या सर्व पिल्लांना भुवनेश्वर येथील नंदनकानन प्राणीसंग्रहालयात हलवण्यात आले आहे.
सुमात्रन ऑरंगुटान असल्याचा प्राथमिक अंदाज
इंडोनेशियाच्या वन मंत्रालयाने दिलेल्या माहितीनुसार, प्राथमिक निरीक्षणावरून ही पाचही पिल्ले सुमात्रन ऑरंगुटान असण्याची शक्यता आहे. मात्र, त्यांच्या प्रजातीची तसेच आनुवंशिक (जेनेटिक) उत्पत्तीची खात्री DNA चाचणीद्वारे करण्यात येणार आहे.
इंडोनेशियाच्या वन मंत्रालयाचे जनसंपर्क आणि परराष्ट्र सहकार्य विभागाचे प्रमुख रिस्टीआंतो प्रिबादी यांनी सांगितले की, शारीरिक वैशिष्ट्यांच्या प्राथमिक निरीक्षणावरून ही पिल्ले सुमात्रन ऑरंगुटान असल्याचा संशय आहे. अंतिम निष्कर्षासाठी DNA चाचणी आवश्यक असल्याचेही त्यांनी स्पष्ट केले.
ऑरंगुटानना हिंदुस्थानातून परत आणण्याची प्रक्रिया जलद करण्यासाठी इंडोनेशियाने हिंदुस्थानी अधिकाऱ्यांशी समन्वय सुरू केला आहे. यामध्ये हिंदुस्थानच्या CITES व्यवस्थापन प्राधिकरणाचा तसेच नवी दिल्ली आणि जकार्ता येथील राजनैतिक मिशनचा समावेश आहे.
याशिवाय इंडोनेशियाची National Research and Innovation Agency आणि कृषी मंत्रालय यांच्याशीही समन्वय साधला जात आहे. या पिल्लांना सुरक्षितपणे इंडोनेशियात परत आणण्यासाठी आवश्यक प्रक्रिया पूर्ण करण्यावर भर देण्यात येत आहे.
आंतरराष्ट्रीय वन्यजीव तस्करीचा संशय
ऑरंगुटान केवळ सुमात्रा आणि बोर्निओ या बेटांवर नैसर्गिकरित्या आढळतात. त्यामुळे ओडिशातील जंगलात ही पिल्ले सापडल्याने त्यांच्या हिंदुस्थानात येण्यामागे आंतरराष्ट्रीय वन्यजीव तस्करीचा संशय अधिक बळावला आहे.
ओडिशाचे पर्यावरण मंत्री राम सिंह खुंटिया यांनी यापूर्वी या प्रकरणामागे आंतरराष्ट्रीय तस्करीचे रॅकेट असण्याची शक्यता व्यक्त केली होती. तपास यंत्रणा या दिशेनेही चौकशी करत आहेत.
ऑरंगुटानच्या व्यावसायिक व्यापारावर बंदी
धोक्यात असलेल्या वन्यजीवांच्या आंतरराष्ट्रीय व्यापाराचे नियमन करणाऱ्या CITES या जागतिक कराराअंतर्गत ऑरंगुटानचा आंतरराष्ट्रीय व्यावसायिक व्यापार प्रतिबंधित आहे. त्यामुळे या पिल्लांना हिंदुस्थानात आणण्यामागील मार्ग आणि त्यात सहभागी असलेल्या व्यक्ती किंवा टोळीचा शोध घेणे तपासासाठी महत्त्वाचे ठरणार आहे.
