वाढते वजन ही समस्या सध्याच्या घडीला जवळपास सर्वच वयोगटाला भेडसावत आहे. खाण्याच्या अवेळा, फास्ट फूडचे अति प्रमाणात सेवन यामुळे वजन वाढत आहे. परंतु यावर अनेकदा व्यायाम किंवा डाएट हा पुरेसा उपाय नसतो. तर यावर योग्य आहार आणि काही महत्त्वाच्या टिप्स सुद्धा गरजेच्या असतात.
वजन कमी करण्यासाठी अनेकजण सकाळी बडीशेप किंवा मेथीचे पाणी पिण्याचा उपाय करतात. मात्र, वजन कमी करण्यासाठी केवळ एखाद्या मसाल्याच्या पाण्यावर अवलंबून राहणे पुरेसे नाही. संतुलित आहार आणि नियमित व्यायाम यांचीही तितकीच गरज असते.
बडीशेप पचनासाठी फायदेशीर मानली जाते. तिच्या सेवनामुळे गॅस, अपचन आणि बद्धकोष्ठतेसारख्या त्रासांमध्ये आराम मिळण्यास मदत होऊ शकते. बडीशेपमध्ये अँटीऑक्सिडंट्सही असतात. त्यामुळे शरीराला ऑक्सिडेटिव्ह स्ट्रेसपासून संरक्षण मिळण्यास मदत होऊ शकते.
दुसरीकडे, मेथीचे दाणे फायबरने समृद्ध असतात. त्यामुळे पोट जास्त वेळ भरल्यासारखे वाटू शकते आणि भूक नियंत्रित ठेवण्यास मदत होऊ शकते. मेथीचा रक्तातील साखरेच्या नियंत्रणावरही काही प्रमाणात परिणाम होऊ शकतो.
त्यामुळे वजन कमी करण्यासाठी बडीशेप किंवा मेथी यापैकी एकच सर्वोत्तम आहे असे निश्चितपणे म्हणता येत नाही. बडीशेप पचनासाठी, तर मेथी तृप्ती आणि आहारातील फायबरसाठी उपयुक्त ठरू शकते.
