मुंबईच्या महापौर ऋतु तावडे यांच्या कार्यालयाला बॉम्बने उडवण्याची धमकी देणारा ई-मेल प्राप्त झाल्याने सुरक्षा यंत्रणांमध्ये खळबळ उडाली आहे. या ई-मेलमध्ये मुंबईतील तीन ते चार शाळांमध्येही बॉम्ब ठेवल्याचा दावा करण्यात आला आहे. महापौरांच्या कार्यालयाला धमकी मिळण्याची ही तिसरी घटना असल्याची माहिती मुंबई पोलिसांनी दिली.
दरम्यान, धमकीचा ई-मेल मिळाल्यानंतर मुंबई पोलीस आणि सुरक्षा यंत्रणा अलर्ट झाल्या. पोलिसांनी बॉम्ब शोधक पथका आणि श्वानपथकाच्या मदतीने संबंधित ठिकाणी तपासणी केली, मात्र कोणतीही संशयास्पद वस्तू आढळली नाही. धमकीचा ई-मेल पाठवणाऱ्याचा शोध घेण्यासाठी पोलिसांनी तपास सुरू केला आहे. ‘आयएएनएस’ने याबाबत वृत्त दिले आहे.
BMC Mayor Ritu Tawde’s office received a bomb threat email, marking the third such incident involving the mayor. The email also threatened to blow up three to four schools in Mumbai. Mumbai Police conducted checks at the locations in accordance with standard operating procedures but found nothing suspicious. Police are investigating the matter and trying to trace the sender of the email: Mumbai Police
— IANS (@ians_india) October 23, 2026
दरम्यान, ठाणे जिल्ह्यातील भाईंदर रेल्वे स्थानक आणि भाईंदर पोलीस ठाणे उडवण्याची धमकी देणारा ई-मेल मीरा-भाईंदर, वसई-विरार पोलीस मुख्यालयाला प्राप्त झाला होता. बुधवारी हा ई-मेल मिळाल्यानंतर पोलिसांची पथके तातडीने दोन्ही ठिकाणी दाखल झाली. पोलिसांनी श्वानपथकाच्या मदतीने परिसराची कसून तपासणी केली. खबरदारीचा उपाय म्हणून संबंधित परिसराची झडती घेण्यात आली; मात्र कोणतीही स्फोटक सामग्री किंवा संशयास्पद वस्तू आढळली नाही. त्यामुळे ही धमकी अफवा असल्याचे स्पष्ट झाले.
