पालिकेच्या विलेपार्ले येथील कूपर रुग्णालयात सफाई कामगारांचे वेतन कंत्राटदारांकडून दोन ते तीन महिने रखडवले जात असून प्रॉव्हिडंट फंडाची रक्कमही दिली जात नाही. शिवाय राज्य सरकारच्या विमा योजनेचा फायदाही दिला जात नसून नाहक त्रासही दिला जात आहे. याबाबत पालिका प्रशासनाकडे वारंवार पाठपुरावा करूनही कोणताही प्रतिसाद दिला जात नाही. त्यामुळे संबंधित मुजोर कंपनीवर तातडीने कार्यवाही न झाल्यास जोरदार आंदोलन करण्यात येईल, असा इशारा म्युनिसिपल कामगार कर्मचारी सेनेने दिला आहे.
कूपरमध्ये कल्पतरू कंपनीकडून सफाई कामगारांची सेवा पुरवली जाते. ‘कल्पतरू’ कंपनीचे कंत्राट 2019 साली संपलेले असूनदेखील कूपर प्रशासन या कंपनीला 3-3 महिन्यांचे कंत्राट बेकायदेशीरपणे वाढवून देत आहे, असा आरोपही कामगार सेनेने केला आहे. दरम्यान, कूपर रुग्णालय कार्यालयातील कर्मचाऱ्यांकडून व कल्पतरू हाऊसकिपिंग कंपनी कर्मचाऱ्यांकडून संबंधित तक्रारीची माहिती घेतलेली आहे. या पार्श्वभूमीवर सर्व बेकायदेशीर बाबींची चौकशीही होत आहे.
आंदोलन झाल्यास प्रशासन जबाबदार
राज्य कामगार विमा संरक्षण कामगारांना मिळत नाही, महिला कर्मचाऱ्यांनी वरील बाबी विचारणा केल्यास दमबाजी करून कल्पतरूचे कर्मचारी दादागिरी करीत असतात. प्रशासनाने संबंधित कंपनीवर तातडीने कारवाई न केल्यास म्युनिसिपल कर्मचारी कामगार सेनेचे अध्यक्ष बाबा कदम यांच्या नेतृत्वाखाली ठिय्या आंदोलन होणार आहे. आंदोलनामुळे रुग्णसेवेवर परिणाम झाल्यास रुग्णालय प्रशासन जबाबदार राहील, असा इशारा कामगार सेनेकडून देण्यात आला आहे.
