इस्रायल आणि इराण यांच्यात युद्ध थांबवण्यासाठी चर्चा सुरू असतानाच, इस्रायली सैन्याने लेबनानमध्ये प्रवेश केल्यामुळे परिस्थिती बिघडली होती. यावर संतापलेल्या इराणने अमेरिकेशी चर्चा करण्यास नकार दिला. मात्र आता या संपूर्ण प्रकरणात एक मोठी घडामोड समोर आली आहे. अमेरिकेचे राष्ट्राध्यक्ष डोनाल्ड ट्रम्प यांनी स्वतः या प्रकरणात पुढाकार घेतला आहे. ट्रम्प यांनी इस्रायलचे पंतप्रधान बेंजामिन नेतन्याहू यांच्याशी फोनवरून चर्चा केली असून, त्यानंतर बैरूतच्या दिशेने पुढे सरकणाऱ्या इस्रायली सैन्याला मागे बोलावण्यात आले आहे. आज तकने यासंदर्भात वृत्त दिले आहे.
डोनाल्ड ट्रम्प यांनी दावा केला आहे की, पंतप्रधान नेतन्याहू यांच्याशी त्यांची अत्यंत सकारात्मक चर्चा झाली. इस्रायलने बैरूतमध्ये आपले सैन्य न पाठवण्याचा आणि पुढे गेलेल्या तुकड्यांना मागे बोलावण्याचा निर्णय घेतला आहे. इतकेच नाही तर ट्रम्प यांच्या प्रतिनिधींनी थेट हिजबुल्लाशीही संवाद साधला आहे. या चर्चेदरम्यान हिजबुल्लाच्या प्रतिनिधींनी गोळीबार थांबवण्यास संमती दिली आहे. आता हिजबुल्ला इस्रायलवर हल्ला करणार नाही आणि इस्रायलही हिजबुल्लावर कारवाई करणार नाही, यावर एकमत झाले आहे, असे वृत्त आहे. यामुळे सध्या तरी गोळीबार थांबण्याची आशा निर्माण झाली आहे, तरीही प्रत्यक्ष शांततेचा मार्ग अजून बराच लांब आहे.
इराणसोबतच्या तणावावर ट्रम्प यांचे वक्तव्य
इराण आणि अमेरिका यांच्यात प्रामुख्याने इराणच्या अणुकार्यक्रमावरून दीर्घकाळापासून तणाव सुरू आहे. मात्र गेल्या काही काळापासून दोन्ही देश मध्यस्थांच्या माध्यमातून एकमेकांशी चर्चा करत होते, जेणेकरून एखादा करार होऊन युद्धाची परिस्थिती टाळता येईल. लेबनानमध्ये सक्रिय असलेल्या आणि इराणचा पाठिंबा असलेल्या हिजबुल्ला या संघटनेला इस्रायल स्वतःसाठी मोठा धोका मानतो. या दोन्ही संघर्षांचा एकमेकांवर परिणाम झाल्याने हे नवीन संकट उभे राहिले होते.
दरम्यान, इराणने चर्चा थांबवल्याच्या वृत्तावर ट्रम्प यांनी ‘NBC न्यूज’शी बोलताना सांगितले की, “मला इराणकडून चर्चा थांबवण्याबाबत कोणताही संदेश मिळालेला नाही. पण खरं सांगायचं तर, मला वाटतं आपण खूप जास्त बोललो आहोत आणि आता शांत राहणेच सर्वात योग्य ठरेल.”
