पंजाबमधील लुधियाना शहरात रविवारी सकाळी झालेल्या गॅस गळतीमध्ये 11 जणांचा मृत्यू झाला. शहरातील ग्यासपुरा औद्योगिक परिसरात ही घटना घडली असून या दुर्दैवी घटनेमध्ये एक आख्ख कुटुंब बळी पडले आहे. पती, पत्नीसह तीन लहान मुलांचा यात मृत्यू झाला. सध्या पोलिसांनी हा संपूर्ण भाग सील केला येथे अग्निशमन दलासह एक रुग्णवाहिका तैनात करण्यात आली आहे. ‘हिंदुस्थान टाइम्स’ने याबाबत वृत्त दिले आहे.
रविवारी सकाळी घडलेल्या या दुर्घटनेत जमालपूर येथील शंभू नारायण यांच्या पुतण्याचे संपूर्ण कुटुंब गेले. माध्यमांशी बोलताना ते म्हणाले की, गॅस गळतीमध्ये माझ्या पुतण्याचे आख्ख कुटुंब बळी पडले. पुतण्या कबिलाश कुमार (वय – 40) आणि त्याची पत्नी बरशा देवी, मोठी मुलगी कल्पना (वय – 16), मधला मुलगा नारायण (वय – 12) आणि धाकटा मुलगा आर्यन (वय – 9) या सर्वांचा यात मृत्यू झाला. हे सांगताना त्यांना हुंदका आवरता आला नाही. लुधियानाचे पोलीस आयुक्त मनदीप सिंग सिद्धू यांनीही याला दुजारे दिला आहे.
#WATCH | Ludhiana gas leak | Mandeep Singh Sidhu, Ludhiana Police Commissioner says, “…11 people, including 5 members of one family, died. Four others are admitted to the hospital. Their condition is serious…We are lodging a case at the concerned PS. Gas sampling will be done… pic.twitter.com/K6sPb7j7qA
— ANI (@ANI) April 30, 2023
ग्यासपुरा भागातील स्थानिक राम मूरत यांनी सांगितले की, त्यांच्या कुटुंबातील सौरव गोयल (वय – 28) आणि त्यांची पत्नी तृती गोयल, भाऊ गौरव गोयल, त्यांची आणि आठ महिन्यांचा मुलगा यांनाही गॅस गळतीचा त्रास झाला. चिमुरडाची सध्या सुखरूप असला तरी त्याच्या आई-वडिलंचा आणि आजीचा यात मृत्यू झाला, तर गौरवची प्रकृती गंभीर आहे.
अन्य एक स्थानिक उमेश कुमार यांनी सकाळी नेमकं काय घडलं याबाबत माहिती दिली. ते म्हणाले की, सकाळी दुर्गंधी आणि डोकेदुखीने जाग आली. गॅसपासून वाचण्यासाठी आम्ही दारं, खिडक्या बंद केली. मात्र तरीही वास असह्य झाल्याने आम्ही जवळच राहणाऱ्या एका नातेवाईच्या घरी जाण्याचा निर्णय घेतला.
दरम्यान, या दुर्घटनेत आतापर्यंत 11 जणांचा मृत्यू झाला असून अनेक जणांवर रुग्णालयात उपचार सुरू आहेत. मॅनहोलमध्ये रासायनीक प्रक्रिया झाल्याने ही घटना घडली असावी आणि न्युरोटॉक्सिनमुळे नागरिकांचा मृत्यू झाला असावा अशी शक्यता लुधियानाच्या उपायुक्त सुरभी मलिक यांनी व्यक्त केली. एनडीआरएफचे पथक घटनास्थळावरून आणि मॅनहोलमधून नमुने गोळा करत असल्याचे त्यांनी सांगितले.
मुख्यमंत्र्यांनी व्यक्त केला शोक
पंजाबचे मुख्यमंत्री भगवंत मान यांनी या दुर्दैवी घटनेवर शोक व्यक्त केला असून ही घटना अतिशय वेदनादायी असल्याचे म्हटले. घटनास्थळी पोलीस, जिल्हा प्रशासन आणि एनडीआरएफचे पथक उपस्थित असून शक्य ती सर्व मदत केली जात असल्याचे त्यांनी म्हटले.
