पुण्यात सोमवारी रात्री झालेल्या मुसळधार पावसामुळे संपूर्ण शहर जलमय झाले होते. अनेक भागात गुडघाभर पाणी भरले होते. पुण्यात पावसामुळे अनेक ठिकाणी नुकसान झाल्याचे देखील वृत्त आहे. त्यावरून राष्ट्रवादी काँग्रेसचे प्रदेशाध्यक्ष जयंत पाटील यांनी पुणे महानगरपालिकेत सत्तेत असलेल्या भाजपला फटकारले आहे.
”पुणे शहरात अक्षरशः रस्त्यांच्या नद्या बनलेल्या आहेत. गेले 24 तास नागरिकांना प्रचंड मनस्तापाला सामोरे जावे लागत आहे. गेली पाच वर्ष पुणे महानगरपालिकेत भारतीय जनता पक्षाची सत्ता आहे. ‘नव्या पुण्याच्या शिल्पकारांनी‘ पाच वर्ष पुण्याचा केलेला विकास पुण्याच्या रस्त्यावरून वाहत आहे” अशा शब्दात राष्ट्रवादी काँग्रेसचे प्रदेशाध्यक्ष आणि माजी जलसंपदा मंत्री जयंत पाटील यांनी देवेंद्र फडणवीस यांना टोला लगावला आहे.
पुण्यासारख्या जागतिक पातळीवर महत्वाच्या असणाऱ्या शहरात असे चित्र निर्माण होणे हे अत्यंत दुर्दैवी आहे असेही जयंत पाटील यांनी ट्विटमध्ये म्हटले आहे.
