गावागावांमधील सरकारी शाळांची स्थिती सुधारण्यासाठी ‘सीजेपी’चे संस्थापक अभिजित दीपके हे १५ ऑगस्ट (स्वातंत्र्य दिना) पासून ‘शाळा ठीक करा’ या नवीन देशव्यापी अभियानाला सुरुवात करणार आहेत. विद्यार्थ्यांना मूलभूत सुविधांसाठी संघर्ष करावा लागू नये यासाठी हे अभियान सुरू करण्यात आले असून, मराठवाड्यातील हिंगोली येथून या मोहिमेचा प्रारंभ होणार आहे.
“देशाच्या स्वातंत्र्याला ७८ वर्षे (किंवा ८० वर्षे) पूर्ण झाली तरीही ग्रामीण भागातील सरकारी शाळांमध्ये शिकणाऱ्या विद्यार्थ्यांना मूलभूत सुविधा पुरवण्यात आपण एक देश म्हणून अपयशी ठरलो आहोत. त्यामुळे स्वातंत्र्यदिनापासून सीजेपीने गावागावांतील सरकारी शाळांची स्थिती सुधारण्यासाठी ‘शाळा ठीक करा’ हे अभियान सुरू केले आहे,” अशी माहिती दीपके यांनी दिली.
या मोहिमेची सुरुवात हिंगोली येथून होणार असून, नागरिकांनी यात मोठ्या संख्येने सहभागी होण्याचे आवाहन दीपके यांनी केले आहे. हिंगोली येथील सरपंचांची भेट घेऊन सरकारी शाळांमध्ये आवश्यक त्या सुधारणा करण्याची मागणी केली जाणार आहे. त्याचबरोबर सीजेपीची संपूर्ण टीम विविध गावांतील शाळांना भेट देऊन तेथे बाक (बेंच), स्वच्छतागृह (बाथरूम), वीज आणि पिण्याचे पाणी यांसारख्या पायाभूत सुविधा उपलब्ध करून देण्याची मागणी लावून धरणार आहे.
