नावडी (पाग आळी)येथील प्रसिद्ध मूर्तिकार जितेंद्र प्रसादे आणि बंधू यांच्या ‘प्रसादे बंधू गणपती कारखान्या’ने यंदा आपली १०५ वर्षे पूर्ण केली असून, कारखाना आता १०६ व्या वर्षात दिमाखात पदार्पण करत आहे. एकाच कुटुंबाने सलग चार पिढ्या गणेशमूर्ती कलेचा हा समृद्ध वारसा अखंडपणे जपला आहे.
या गणेश मूर्ती शाळेचा गौरवशाली प्रवास, सुरुवात (पहिली पिढी) एका शतकापूर्वी कै. दशरथ प्रसादे यांनी शाडूच्या मातीपासून सुंदर गणेशमूर्ती साकारायला सुरुवात केली आणि या कारखान्याचा पाया रचला. दुसरी पिढी, त्यानंतर कै. विठोबा दशरथ प्रसादे यांनी अनेक वर्षे मूर्तींचे मातीकाम आणि रंगकामाची धुरा सांभाळत कलेला पुढे नेले.तिसरी पिढी, पुढे कै. चंद्रकांत विठोबा प्रसादे यांनी आपल्या कल्पकतेने विविध प्रकारच्या आकर्षक गणेशमूर्ती घडवल्या. तसेच श्री. वामन विठोबा प्रसादे यांनी या कारखान्यात तब्बल ६२ वर्षे अविरत सेवा दिली.
अखंड सेवा कारखान्याचे ज्येष्ठ मूर्तिकार अशोक काका प्रसादे (वय ८१ वर्षे) हे आजही वयाच्या या टप्प्यावर गेल्या ६६ वर्षांपासून तितक्याच उत्साहाने मातीकाम आणि रंगकाम करत आहेत.चौथ्या पिढीकडे वारसा आणि कारखान्यात लगबग:सध्या प्रसादे कुटुंबाची चौथी पिढी हा वारसा समर्थपणे पुढे चालवत आहे. यंदा विशेषतः शाडूच्या मातीपासून बनवलेल्या साच्यातील आणि हाताने घडवलेल्या वैशिष्ट्यपूर्ण मूर्ती साकारण्यात आल्या आहेत. यामध्ये राजाभाऊ प्रसादे, जितेंद्र प्रसादे, गणेश प्रसादे, साईश शेरे आणि सागर वेल्हाळ हे कलाकार अहोरात्र मेहनत घेत आहेत.सध्या गणेशोत्सवाच्या पार्श्वभूमीवर कारखान्यात प्रचंड लगबग सुरू असून, बाप्पाच्या मूर्तींना शेवटचा रंगाचा हात देण्याचे काम वेगाने सुरू आहे. १०५ वर्षांची परंपरा असलेल्या या कारखान्यातील घरगुती आणि पर्यावरणपूरक शाडूच्या मूर्तींना भाविकांची मोठी पसंती मिळत आहे.
