टीडीसी बँक निवडणुकीच्या पूर्वसंध्येला वसईत पाकिटांचा खेळ दिसून आला. भाजप कार्यालयातून चक्क पैसे वाटप होत असल्याचा खळबळजनक आरोप बहुजन विकास आघाडीने केला आहे. बविआचे नगरसेवक निषाद चोरघे व प्रशांत राऊत यांनी पोलिसांसह विरारमधील भाजपच्या कार्यालयावर धाड टाकली असून पैशाच्या हेराफेरीचा पर्दाफाश केला आहे. दरम्यान या धाडीमध्ये ४ लाख ४ हजार रुपये किंमतीची २१ पाकिटे जप्त करण्यात आली आहेत. टीडीसी बँकेच्या मतदारांना पैसे वाटणार्‍यांवर पोलीस काय कारवाई करणार याकडे सर्वांचे लक्ष लागले आहे.
टीडीसी बँकेच्या संचालक मंडळाची निवडणूक उद्या २७ जून रोजी होत असून त्यासाठी ठाणे व पालघर जिल्ह्यात राजकीय चढाओढ सुरू आहे. २१ पैकी १० जागा यापूर्वीच बिनविरोध निवडून आल्या आहेत. उर्वरित जागांसाठी उद्या मतदान होणार असून त्यासाठी सहकार पॅनल व परिवर्तन पॅनेलमध्ये चुरस होणार आहे. प्रत्यक्ष मतदान सुरू होण्यास काही तास उरले असतानाच आज सायंकाळी विरार पूर्वेतील भाजपच्या कार्यालयात मतदारांना पैसे वाटण्याची तयारी सुरू असल्याचे बविआचे नगरसेवक निषाद चोरघे व प्रशांत राऊत यांना समजले. त्यांनी ही बाब त्वरित पोलिसांना कळवली. त्यानंतर पोलिसांनी धाव घेऊन कार्यालयावर धाड टाकली.
ते पैसे व्यावसायिकाचे असल्याचा दावा
धाडीत ५ हजार, ३७ हजार व ३८ हजार रुपयांची २१ पाकिटे आढळून आली असून ती सर्व पोलिसांनी जप्त केली असल्याची माहिती महापौर अजीव पाटील यांनी दिली. हे पैसे नेमके कोणाला वाटण्यात येणार होते याची चौकशी सुरू आहे. मात्र हे सर्व पैसे एका बँकेतील होते. एक व्यावसायिक आमच्या कार्यालयात आला होता. त्याचे हे पैसे असल्याचा दावा भाजपचे विरार शहराध्यक्ष मनीष वैद्य यांनी केला आहे. टीडीसी बँकेच्या निवडणुकीचा याच्याशी काहीही संबंध नसल्याचे त्यांनी सांगितले.
विधानसभेच्या वेळीही झाले होते पैसे वाटप
विधानसभा निवडणुकीच्या वेळीही विवांता हॉटेलमध्ये भाजप नेत्यांच्या उपस्थितीत अशाच पद्धतीने पैसे वाटप करण्यात आले होते. बविआच्या माजी आमदार क्षितीज ठाकूर यांनी आपल्या कार्यकर्त्यांसोबत स्टिंग ऑपरेशन करीत त्याचा पर्दाफाश केला होता. आज त्याचाच अ‍ॅक्शन रिप्ले टीडीसी बँक निवडणुकीच्या निमित्ताने दिसून आला. टीडीसी बँकेचे वसई, विरार व नालासोपार्‍यात १ हजार २०० मतदार आहेत
