रोहित शर्मा आणि यशस्वी जैस्वालने दमदार सुरुवात दिल्यानंतरही अवघ्या 36 धावांमध्ये 5 विकेट गमावल्याने रांची कसोटी हिंदुस्थानच्या हातून निसटल्याचे चित्र होते. मात्र दुसरीच कसोटी खेळणाऱ्या ध्रुव जुरेल आणि शुभमन गिल यांनी खराब झालेल्या खेळपट्टीवरही शड्डू ठोकला आणि हिंदुस्थानला विजय मिळवून दिला. इंग्लंडने विजयासाठी दिलेले 192 धावांचे आव्हान हिंदुस्थानने 5 विकेट्सच्या मोबदल्यात पूर्ण केले आणि 5 कसोटी सामन्यांच्या मालिकेतमध्ये 3-1 अशी विजयी आघाडी घेतली.
An unbeaten 72*-run partnership between @ShubmanGill & @dhruvjurel21 takes #TeamIndia over the line!
India win the Ranchi Test by 5 wickets 👏👏
Scorecard ▶️ https://t.co/FUbQ3MhXfH#TeamIndia | #INDvENG | @IDFCFIRSTBank pic.twitter.com/ORJ5nF1fsF
— BCCI (@BCCI) February 26, 2024
इंग्लंडने दिलेल्या आव्हानाचा पाठलाग करताना हिंदुस्थानने तिसऱ्या दिवसाखेर बिनबाद 40 धावा केल्या होत्या. त्यानंतर चौथ्या दिवशी यात रोहित आणि यशस्वीने आणखी 44 धावांची भर घातली. मात्र रुटने ही जोडी फोडली. यशस्वी 37 धावांवर बाद झाला. तेव्हा हिंदुस्थानची धावसंख्या 1 बाद 84 अशी होती.
त्यानंतर रोहित शर्माने अर्धशतक ठोकले, मात्र त्यानंतर तो लगेचच बाद झाला. रोहितपाठोपाठ (55) रजत पाटीदार (0), रवींद्र जडेजा (4), सरफराज खानही (0) आल्या पावली माघारी परतल्याने हिंदुस्थानचा डाव 5 बाद 120 असा संकटात सापडला.
खेळपट्टी खराब होत चाललेली. समोर मालिकेत सर्वाधिक विकेट घेणारा टॉम हार्टली आणि पहिल्या डावात 5 विकेट घेणारा बशीर खान फिरकीचं जाळं विणत असल्याने सामना हिंदुस्थानच्या हातातून गेला असे वाटत होते. हिंदुस्थानला विजयासाठी आणखी 72 धावांची गरज होती. ध्रुव जुरेल आणि शुभमन गिल ही फलंदाजांची अखेरची जोडी मैदानात होती. त्यामुळे इथे विकेट पडली तर पराभव अटळ असेच वाटत होते.
मात्र दोघांनीही अनुभवी फलंदाजाप्रमाणे नांगर टाकला आणि एकेरी-दुहेरी धावांवर भर दिला. संधी मिळेल तिथे चौकारही वसूल केला. अखेर विजय दृष्टीपटात आल्यानंतर गिलने षटकारही खेचले आणि अर्धशतकही पूर्ण केले. त्यानंतर जुरेलने दुहेरी धाव घेत हिंदुस्थानच्या विजयावर शिक्कामोर्तब केला आणि मैदानात जल्लोष सुरू झाला. गिल 52, तर जुरेल 37 धावांवर नाबाद राहिला. जुरेलला सामनावीर पुरस्कार देऊन गौरवण्यात आले.
धावफलक –
इंग्लंड – 353 आणि 145
हिंदुस्थान – 307 आणि 192 (5 विकेट्सने विजयी)
