मतदार यादीच्या विशेष सखोल पुनरीक्षणाच्या (SIR) विरोधात २३ ऑक्टोबर रोजी देशव्यापी आंदोलन करण्यात येणार आहे. या आंदोलनात केंद्रीय अर्थमंत्री निर्मला सीतारामन यांचे पती आणि प्रसिद्ध राजकीय अर्थतज्ज्ञ परकला प्रभाकर सहभागी होणार आहेत. तसेच कॉक्रोच जनता पार्टीचे संस्थापक अभिजीत दीपके आणि अभिनेते व सामाजिक कार्यकर्ते प्रकाश राज हेही एकाच मंचावर येणार आहेत.
‘पीपल अगेंस्ट SIR’ या आघाडीच्या वतीने या आंदोलनाचे आयोजन करण्यात आले आहे. आंदोलनाच्या माध्यमातून SIR प्रक्रिया रद्द करण्यासह मुख्य निवडणूक आयुक्त ज्ञानेश कुमार यांच्या राजीनाम्याची मागणी केली जाणार आहे. विविध सामाजिक संघटनांचे कार्यकर्ते, राजकीय व्यक्ती आणि नामवंत मंडळी या आंदोलनात सहभागी होण्याची शक्यता आहे.
आज तकने दिलेल्या वृत्तानुसार, परकला प्रभाकर यांनी सोशल मीडियावरील ‘एक्स’ या व्यासपीठावर पोस्ट करत नागरिकांना आंदोलनात सहभागी होण्याचे आवाहन केले आहे. ‘प्रत्येक गल्लीत जंतर-मंतर! शुक्रवार, २३ ऑक्टोबर २०२६. लोकशाहीच्या पुनर्स्थापनेसाठी जनमोर्चा. चला, या आव्हानाचा सामना करूया,’ असे त्यांनी आपल्या पोस्टमध्ये म्हटले आहे. प्रभाकर हे केंद्रातील सत्ताधारी भाजपचे सातत्याने टीकाकार म्हणून ओळखले जातात. त्यांच्या पत्नी निर्मला सीतारामन या भाजपच्या ज्येष्ठ नेत्या आणि केंद्रीय अर्थमंत्री आहेत. मात्र, राजकीय विचारसरणीतील फरक असूनही प्रभाकर यांनी सरकारच्या आर्थिक धोरणांवर आणि लोकशाही संस्थांच्या कार्यपद्धतीवर अनेकदा प्रश्न उपस्थित केले आहेत.
SIR विरोधातील आंदोलनासाठी स्थापन झालेल्या ‘पीपल अगेंस्ट SIR’ या आघाडीमध्ये विद्यार्थी, शेतकरी, दलित, आदिवासी आणि अल्पसंख्याक समुदायांशी संबंधित विविध संघटनांचा समावेश आहे.
