हिंदुस्थानची टी-20 क्रिकेटमधील विजयी मालिका इंग्लंडविरुद्धच्या मालिकेनंतरही कायम राहिली. कर्णधार विराट कोहली व उपकर्णधार रोहित शर्माची खणखणीत अर्धशतके… भुवनेश्वरकुमार व शार्दूल ठाकूर यांची प्रभावी गोलंदाजी… अन् हार्दिक पांडय़ाच्या अष्टपैलू कामगिरीच्या जोरावर टीम इंडियाने इंग्लंडला येथे झालेल्या अखेरच्या लढतीत 36 धावांनी धूळ चारली आणि पाच सामन्यांची मालिका 3-2 अशा फरकाने खिशात घातली.
टीम इंडियाचा संघ मागील आठ टी-20 मालिकांमध्ये अजेय आहे. एकाही मालिकेत पराभूत झालेला नाही. इंग्लंडची विजयी मालिका मात्र खंडित झाली. आठ मालिकांनंतर त्यांच्यावर टी-20 क्रिकेटमध्ये मालिका पराभवाची नामुष्की ओढवली.
दिग्गज फलंदाजांची दमदार भागीदारी
इंग्लंडने नाणेफेक जिंकून प्रथम क्षेत्ररक्षण स्वीकारले. सहा गोलंदाजांसह मैदानात उतरण्याचा निर्णय यावेळी टीम इंडियाने घेतला. लोकेश राहुल नसल्यामुळे रोहित शर्मासोबत कर्णधार विराट कोहलीला सलामीला यावे लागले.
पण हा निर्णय पथ्यावर पडला. हिंदुस्थानच्या दोन दिग्गज फलंदाजांनी 94 धावांची दमदार भागीदारी करताना इंग्लंडच्या गोलंदाजांचा खरपूस समाचार घेतला. मुंबईकर रोहित शर्माने अवघ्या 34 चेंडूंत पाच षटकार व चार चौकारांसह 64 धावांची खेळी साकारली. बेन स्टोक्सच्या गोलंदाजीवर तो त्रिफळाचीत झाला आणि जोडी तुटली.
