स्थळ – हुतात्मा स्मारक ते गेट वे ऑफ इंडिया
वेळ – सकाळी 10 वाजता
मिंधे-भाजप सरकारचा भ्रष्टाचार आणि अक्षम्य बेजबाबदारपणामुळे मालवणच्या राजकोट किल्ल्यावरील छत्रपती शिवाजी महाराजांचा पुतळा कोसळला. त्यामुळे शिवप्रेमी जनतेत तीव्र संताप असून शिवद्रोही सरकारविरोधात महाविकास आघाडी रविवारी मुंबईत जोडे मारा आंदोलन करणार आहे. हुतात्मा चौक येथे अभिवादन करून आंदोलनाला सुरुवात होणार असून गेट वे ऑफ इंडिया येथील छत्रपती शिवाजी महाराजांच्या पुतळ्याजवळ दुर्घटनेचा निषेध करून सरकारला जोडे मारण्यात येणार आहेत. शिवसेना पक्षप्रमुख उद्धव ठाकरे, राष्ट्रवादी काँग्रेसचे अध्यक्ष शरद पवार आणि काँग्रेस प्रदेशाध्यक्ष नाना पटोले यांच्या उपस्थितीत हे आंदोलन होणार आहे.
राजकोट येथील छत्रपती शिवरायांच्या पुतळ्याचे अनावरण लोकसभा निवडणुकीच्या पार्श्वभूमीवर मिंधे सरकारने घाईघाईत पंतप्रधान नरेंद्र मोदी यांच्या हस्ते केले. मुख्यमंत्र्यांसह दोन्ही उपमुख्यमंत्र्यांच्या उपस्थितीत हा कार्यक्रम झाला. त्यानंतर अवघ्या आठ महिन्यांत हा पुतळा कोसळला. त्यामुळे संपूर्ण महाराष्ट्रात शिवप्रेमींमध्ये राज्य सरकारविरोधात संतापाची प्रचंड लाट उसळली असून शिवद्रोही आणि महाराष्ट्रद्रोह्यांना जोडे मारून महाविकास आघाडी हिसका दाखवणार आहे.
शिवरायांना अभिवादन
हुतात्मा स्मारकाजवळ अभिवादन केल्यानंतर गेट वे ऑफ इंडियाकडे प्रचंड संख्येने आंदोलक पूच करणार आहेत. हातात सरकारच्या निषेधाचे फलक आणि धिक्काराच्या घोषणा देत गेट वे येथे आंदोलक जातील. गेट वे ऑफ इंडियाजवळील छत्रपती शिवाजी महाराजांच्या तेजस्वी पुतळय़ाला मान्यवरांकडून अभिवादन करण्यात येईल. या आंदोलनात जनतेने मोठय़ा संख्येने सहभागी व्हावे, असे आवाहन करण्यात आले आहे.
