सामना ऑनलाईन। हरिद्वार
‘या देशात जे लोक माझ्यासारखे अविवाहित राहतील त्यांचा विशेष सन्मान करण्यात यावा. त्याचप्रमाणे जे लोक लग्न करतील आणि दोनपेक्षा अधिक अपत्यांना जन्माला घालतील त्यांचा मतदानाचा अधिकार काढून घ्यावा , अशी मागणी योग गुरु रामदेव बाबा यांनी केली आहे.योगगुरूंच्या या मागणीने सर्वत्र खळबळ उडाली आहे.
हरिद्वार येथे प्रसारमाध्यमांशी बोलताना रामदेव बाबा यांनी ही मागणी केली. हा राजकीय आणि राष्ट्रीय मुद्दा आहे. हिंदुस्थानची लोकसंख्या कमी होती, तेव्हा ज्यादा मुलांना जन्माला घालण्याचं समर्थन करण्यात आलं. १० अपत्यांना जन्माला घालण्याचंही आवाहन करण्यात आलं, असं सांगतानाच ज्यांच्याकडे सामर्थ्य आहे आणि ज्यांची गरज आहे त्यांनी मुलांना जन्माला घालावं. पण दोन मुलं आम्हालाही आमच्या योगप्रसाराच्या कार्यासाठी द्यावीत ,, असं रामदेव बाबा म्हणाले. सध्या देशाची लोकसंख्या सव्वा कोटीपर्यंत गेल्याचंही त्यांनी निदर्शनास आणून दिलं.
यापूर्वीही केले होते खळबळजनक भाष्य
रामदेव बाबा यांनी यापूर्वीही विवाह आणि संततीबाबत खळबळजनक वक्तव्य केले आहे अविवाहित असणं हेच आपल्या यश आणि सुखाचं रहस्य असल्याचं रामदेव बाबांनी यापूर्वी म्हटलं होतं. आनंदी राहण्यासाठी पत्नी आणि मुलांची गरज नाही. अविवाहित असतानाही आपण सुखी राहू शकतो, असंही त्यांनी म्हटलं होतं. आता तर त्यांनी दोनपेक्षा अधिक अपत्य असणाऱ्यांचा मतदानाचा अधिकार काढून घेण्याचं वक्तव्य केल्यानं नव्या वादाला तोंड फुटण्याची शक्यता आहे.
