सामना प्रतिनिधी । नगर
क्षयरोगाचे रुग्ण शोधून काढणे तसेच क्षयरोगाचे उच्चाटन करण्याच्या उद्देशाने क्षयरुग्ण शोधमोहिम राबवली जात आहे. या मोहिमेस जिल्ह्यात 12 नोव्हेंबरपासून सुरुवात झाली आहे. या मोहिमेत जिल्ह्यातील 1 लाख 8 0 हजार 560 नागरिकांची क्षयरोग तपासणी केली जाणार आहे. यासाठी 116 पथके स्थापन करण्यात आली आहेत. या पथकांद्वारे जिल्ह्यातील झोपडपट्टी, बांधकामाची ठिकाणे, आश्रमशाळा, विटभट्ट्या या ठिकाणी जाऊन तपासणी केली जाणार आहे. जिल्हा परिषदेच्या आरोग्य समितीची सभा बुधवारी पार पडली. या सभेत ही माहिती देण्यात आली.
याआधी जिल्ह्यात कुष्ठरुग्ण तपासणी मोहीम राबवण्यात आली होती. या मोहिमेत जिल्ह्यात 79 नवीन कुष्ठरुग्ण आढळले. या रुग्णांवर औषधोपचार सुरू करण्यात आले आहेत. त्यानंतर आता क्षयरोग शोधमोहिम राबवण्यात येत आहे. या मोहिमेत क्षयरोगाची तपासणी करुन थुंकीचे नमुने घेतले जाणार आहेत. क्षयरोगाचे निदान झाल्यानंतर संबंधितांवर औषधोपचार सुरू करण्यात येणार आहेत. तपासणीसाठी 116 पथके तयार केली आहेत. या पथकात आरोग्य विभाग व आशा कर्मचारी आहेत. या पथकांद्वारे दररोज दोनशे नागरिकांची तपासणी केली जाणार असल्याचे सांगण्यात आले. येत्या 27 नोव्हेंबरपासून जिल्ह्यात गोवर रुबेला लसीकरण मोहिम राबवण्यात येणार आहे. या मोहिमेचा आढावा घेण्यात आला. या मोहिमेत 9 ते 15 वर्षे वयोगटातील एकूण 12 लाख मुलांचे लसीकरण केले जाणार आहे. यासाठी जिल्ह्यात 10 हजार 317 लसीकरण सत्र आयोजित करण्यात येणार आहेत. शाळा व अंगणवाड्यात लस दिली जाणार असल्याचे सांगण्यात आले. याव्यतिरिक्त स्वाइन फ्लू, डेंगी, हिवताप व इतर किटकजन्य आजारांचा आढावा सभेत घेण्यात आला. कुटुंब नियोजन शस्त्रक्रिया योजनेंतर्गत ऑक्टोबर 2018 अखेर 58 टक्के शस्त्रक्रिया होणे अपेक्षित होते. परंतु, जिल्ह्यात 55 टक्के उद्दीष्ट साध्य झाल्याचे सांगण्यात आले. या सभेस सदस्य रामभाऊ साळवे, सिताराम राऊत, जिल्हा आरोग्य अधिकारी डॉ. संदीप सांगळे उपस्थित होते.
क्षयाचे आव्हान मोठे असले तरी योग्य असे पथ्यपाणी, नेमके उपचार आणि नियमित व्यायाम यांनी क्षय जिंकता येतो. प्रत्येक पेशंटने योग्य ती काळजी घेतली तर क्षयाचा प्रसारही आपल्याला थांबवता येईल. टीबी हा आजार केवळ समाजातील निम्नस्तरातील व्यक्तींना होतो. आपल्याला तो होऊ नाही शकत हा गैरसमज मनातून काढून टाकणे गरजेचे आहे. जीवनशैलीत फार बदल न करताही या रोगापासून दूर राहणे सहज शक्य आहे. आहारात प्रथिनयुक्त पदार्थांचा समावेश आणि समतोल आहार घेतल्यास टीबी विरोधातील पहिला टप्पा यशस्वी होऊ शकतो. सकाळी उपाशीपोटी बाहेर पडण्याची सवय सोडून नाश्त्याचे महत्त्व जाणणे, अत्यंत आवश्यक आहे. खोकताना, शिंकताना तोंडावर रूमाल-फडके घेणे, याची सवयच सर्वांना लागली पाहिजे. दिवसाकाठी पुरेसा आराम, झोप आणि व्यायाम यामुळे शारीरिक स्थिती उत्तम राखण्यात मदत होते. या सर्व बाबींकडे लक्ष दिले तर टीबीवर नियंत्रण मिळवणे अवघड नाही.
