मध्य प्रदेशातील खरगोन जिल्ह्यात पतीच्या कथित विवाहबाह्य संबंधांच्या संशयातून आणि तो आपल्याला व नऊ मुलांना सोडून जाईल या भीतीपोटी एका ३५ वर्षीय महिलेने झोपेत असलेल्या पतीची कुऱ्हाडीने हत्या केल्याची धक्कादायक घटना उघडकीस आली आहे. या प्रकरणी पोलिसांनी आरोपी पत्नीला अटक केली असून न्यायालयाने तिला न्यायालयीन कोठडी सुनावली आहे.
पोलिसांनी दिलेल्या माहितीनुसार, ही घटना चैनपूर पोलीस ठाण्याच्या हद्दीतील बाजार खोद्रा चिडिया गावात घडली. मृताची ओळख इडा डुडवे (४५) अशी झाली असून आरोपी पत्नीचे नाव रुमली बाई डुडवे (३५) आहे.
खरगोनचे सहाय्यक पोलीस अधीक्षक (शहर) बिट्टू सेहगल यांनी सांगितले की, १० जुलै रोजी मृताच्या भावाने अज्ञात व्यक्तीने इडा डुडवे यांची हत्या केल्याची तक्रार दाखल केली होती. त्यानंतर पोलिसांनी खुनाचा गुन्हा दाखल करून तपास सुरू केला.
सुरुवातीच्या तपासात आरोपी पत्नीनेही अज्ञात व्यक्तीनेच पतीची हत्या केल्याचे पोलिसांना सांगितले होते. त्यामुळे हा गुन्हा बाहेरील व्यक्तीने केल्याचा संशय व्यक्त केला जात होता. मात्र तपास जसजसा पुढे सरकला, तसतसे पती-पत्नीमध्ये वारंवार वाद होत असल्याची माहिती समोर आली.
यानंतर पोलिसांनी रुमली बाईची सखोल चौकशी केली असता तिने पतीची हत्या केल्याची कबुली दिली. चौकशीत तिने पतीचे दुसऱ्या महिलेशी कथित प्रेमसंबंध असल्याचा संशय व्यक्त केला. पती आपल्याला आणि नऊ मुलांना सोडून त्या महिलेशी विवाह करेल, अशी भीती तिला वाटत होती.
या कारणावरून पती-पत्नीमध्ये सातत्याने वाद होत होते. अखेर या वादांना कंटाळून आणि पती आपल्याला सोडून जाईल या भीतीने रुमली बाईने ९ आणि १० जुलैच्या मध्यरात्री पती झोपेत असताना कुऱ्हाडीने वार करून त्याची हत्या केल्याचे पोलिसांनी सांगितले.
हत्येनंतर रुमली बाईने पोलिसांची दिशाभूल करण्याचा प्रयत्न केला. तिने अज्ञात व्यक्तीने पतीचा खून केल्याची बनावट माहिती दिली होती. मात्र तिच्या जबाबातील विसंगती आणि घटनास्थळावरील परिस्थितीमुळे पोलिसांचा संशय बळावला. त्यानंतर केलेल्या चौकशीत तिने गुन्ह्याची कबुली दिली.
रुमली बाईने चौकशीत सांगितले की, सासरच्या लोकांना आपणच पतीची हत्या केल्याचे समजल्यास ते आपल्यालाही ठार मारतील, या भीतीमुळे तिने सत्य लपवले होते.
पोलिसांच्या माहितीनुसार, या दाम्पत्याला नऊ मुले असून त्यामध्ये सहा मुली आणि तीन मुलांचा समावेश आहे. त्यांचे वय अडीच वर्षांपासून १६ वर्षांपर्यंत आहे. या प्रकरणाचा पुढील तपास सुरू आहे.
