पावसाळ्यात केसगळतीची समस्या अनेकांना जाणवते. बदलते हवामान, स्काल्पवरील अतिरिक्त तेलकटपणा, ताणतणाव, पोषणाची कमतरता आणि इतर कारणांमुळे केस पातळ व निस्तेज होऊ शकतात. अशावेळी अनेकजण घरगुती उपायांचा आधार घेतात. केसांच्या निगेसाठी एरंडेल तेल म्हणजेच कॅस्टर ऑइल वापरले जाते. हे तेल घट्ट आणि चिकट असल्याने ते इतर हलक्या तेलांसोबत मिसळून वापरणे सोयीचे ठरू शकते.
नारळाचे तेल : एरंडेल तेल आणि नारळाचे तेल समान प्रमाणात घेऊन मिश्रण स्काल्पवर हलक्या हाताने लावता येते. नारळाचे तेल केसांना कंडिशन करण्यास आणि कोरडेपणा कमी करण्यास मदत करू शकते. साधारण 30 मिनिटे ते एक तास मिश्रण केसांवर ठेवून नंतर सौम्य शॅम्पूने केस धुवावेत.
अॅलोव्हेरा जेल : एक चमचा एरंडेल तेल आणि एक चमचा शुद्ध अॅलोव्हेरा जेल मिसळून ते केसांच्या मुळांवर आणि स्काल्पवर लावता येते. 20 ते 30 मिनिटांनंतर केस धुवावेत. पहिल्यांदा वापरण्यापूर्वी पॅच टेस्ट करणे योग्य ठरते.
कांद्याचे तेल : कांद्याच्या तेलाचा वापरही घरगुती हेअर केअरमध्ये केला जातो. एक चमचा एरंडेल तेलात एक चमचा कांद्याचे तेल मिसळून स्काल्पवर लावता येते. सुमारे 30 मिनिटांनंतर केस धुवावेत. मात्र, कांद्याच्या तेलामुळे प्रत्येक व्यक्तीच्या केसांची वाढ वेगाने होते, याचे पुरेसे वैज्ञानिक पुरावे उपलब्ध नाहीत. वापरल्यानंतर जळजळ, खाज किंवा लालसरपणा जाणवल्यास वापर थांबवावा.
रोझमेरी ऑइल : रोझमेरी एसेंशियल ऑइल थेट स्काल्पवर लावू नये. ते एरंडेल तेल किंवा नारळाच्या तेलासारख्या कॅरियर ऑइलमध्ये मिसळूनच वापरावे. एका चमचा कॅरियर ऑइलमध्ये रोझमेरी एसेंशियल ऑइलचे काही थेंब मिसळून स्काल्पवर हलक्या हाताने लावता येते. डोळ्यांच्या आसपास हे मिश्रण लागू नये आणि आधी पॅच टेस्ट करावी.
कढीपत्ता : कढीपत्त्याचा वापर अनेक घरांमध्ये केसांच्या तेलासाठी केला जातो. नारळाच्या तेलात ताजे कढीपत्ते टाकून ते हलके गरम करावे. तेल पूर्णपणे थंड झाल्यानंतर गाळून घ्यावे आणि त्यातील थोडे तेल एरडेल तेलासोबत मिसळून स्काल्पवर लावता येते. मात्र, कढीपत्ता थेट स्काल्पवर लावल्याने केसांची वाढ होते, याचे ठोस वैज्ञानिक पुरावे उपलब्ध नाहीत.
या सर्व गोष्टी एकाच वेळी एरंडेल तेलात मिसळण्याची गरज नाही. एका वेळी एक किंवा दोन घटक वापरणे अधिक योग्य ठरू शकते. एरंडेल तेल घट्ट असल्याने मोठ्या प्रमाणात वापरल्याने अतिरिक्त फायदा मिळेलच असे नाही. आठवड्यातून एक-दोन वेळा ऑइलिंग करणे पुरेसे ठरू शकते.
केस अचानक मोठ्या प्रमाणात गळत असतील, टाळूवर टक्कल पडलेले भाग दिसत असतील किंवा केस झपाट्याने पातळ होत असतील, तर केवळ घरगुती उपायांवर अवलंबून राहू नये. पोषणाची कमतरता, हार्मोनल बदल, ताणतणाव, औषधे किंवा अन्य आरोग्यविषयक कारणांमुळेही केसगळती होऊ शकते. अशावेळी त्वचारोगतज्ज्ञांचा सल्ला घेणे महत्त्वाचे आहे.
