राष्ट्रीय तपास संस्थेने (NIA) एका दहशतवादी कटाच्या प्रकरणात शनिवारी सकाळी जम्मू आणि काश्मीरच्या अनेक भागांमध्ये मोठी छापेमारी केली. सुरक्षा दलांनी कुलगाम, गांदरबल आणि बांदीपोरासह खोऱ्यातील एकूण सात ठिकाणी शोधमोहीम राबवली आहे. पाकिस्तानस्थित दहशतवादी सूत्रधार आणि स्थानिक भूमिगत कार्यकर्त्यांच्या नेटवर्कशी संबंधित प्रकरणाचा तपास करण्यासाठी ही कारवाई हाती घेण्यात आली असून, एनआयएच्या पथकांनी कुलगाममध्ये दोन, बांदीपोरामध्ये तीन आणि सोपोरमध्ये दोन ठिकाणी झाडाझडती घेतली. स्थानिक पोलीस आणि सुरक्षा दलांनी या शोधमोहिमेदरम्यान एनआयएच्या पथकांना पूर्ण सहकार्य केले असल्याची माहिती अधिकाऱ्यांनी दिली आहे.
NIA carried out raids in different parts of Kashmir as part of an ongoing investigation: Sources pic.twitter.com/l3DZYZi0GA
— IANS (@ians_india) September 12, 2026
तपास यंत्रणेला संशय आहे की, पाकिस्तानस्थित दहशतवादी सूत्रधारांच्या इशाऱ्यावर काम करणाऱ्या स्थानिक नेटवर्कने खोऱ्यात घुसखोरी करणाऱ्या दहशतवाद्यांना रसद (लॉजिस्टिक्स) आणि इतर प्रकारची मदत पुरवली होती. मूळात हे प्रकरण श्रीनगरमधील जकुरा पोलीस ठाण्यात नोंदवण्यात आलेल्या एफआयआर क्रमांक 0024/2026 शी संबंधित आहे. त्यानंतर एनआयएने हे प्रकरण आरसी-02/2026/एनआयए/जेएमयूके म्हणून पुन्हा नोंदवून आपल्या हातात घेतले. या प्रकरणात बेकायदेशीर कृत्ये (प्रतिबंध) कायदा, 1967 च्या कलम 23, शस्त्र कायदा, 1959 च्या कलम 7 आणि 25 तसेच स्फोटक पदार्थ कायदा, 1908 च्या कलम 4 अंतर्गत कायदेशीर कारवाई केली जात आहे.
