एसआयआर प्रक्रियेवरून निर्माण झालेल्या वादावर आता ज्येष्ठ वकील प्रशांत भूषण यांनीही आपली प्रतिक्रिया दिली आहे. निवडणूक आयोगाच्या पारदर्शकतेवर गंभीर प्रश्नचिन्ह उपस्थित होत असतानाच प्रशांत भूषण यांनी मुख्य निवडणूक आयुक्त ज्ञानेश कुमार यांच्यावर थेट कायदेशीर कारवाई करत त्यांच्यावर खटला चालवण्याची मागणी केली आहे. या प्रकरणामुळे देशाच्या राजकीय पाठोपाठ आता न्यायिक वर्तुळातही मोठी खळबळ उडाली आहे.
मतदार याद्यांचे अद्ययावतीकरण करण्याच्या या एसआयआर प्रक्रियेत इतर दोन निवडणूक आयुक्तांना अंधारात ठेवून ज्ञानेश कुमार यांनी अनेक निर्णय एकतर्फी घेतल्याचा खळबळजनक अहवाल नुकताच समोर आला आहे. यावर प्रतिक्रिया व्यक्त करताना प्रशांत भूषण यांनी म्हटले आहे की, हा केवळ प्रशासकीय मतभेदांचा किंवा त्रुटीचा विषय नसून, हा देशाच्या निवडणूक प्रक्रियेतील अत्यंत गंभीर स्वरूपाचा गैरप्रकार आहे.
ते म्हणाले की, “निवडणूक आयोगासारख्या स्वायत्त आणि सर्वोच्च घटनात्मक संस्थेत अशा पद्धतीने एकाधिकारशाहीने काम करणे हे संविधानाच्या मूळ ढाच्याला थेट धक्का पोहोचवणारे आहे. त्यामुळे या संपूर्ण प्रकरणाची तातडीने सखोल आणि निष्पक्ष चौकशी होऊन मुख्य निवडणूक आयुक्त ज्ञानेश कुमार यांच्यावर कायदेशीर कारवाई करण्यात यावी.”
