दोन दिवसांपूर्वी आसाममधील दुसऱ्या टप्प्यातील मतदानानंतर भाजप उमेदवाराच्या गाडीत ईव्हीएम मशीन सापडल्यानंतर खळबळ उडाली होती. त्यावरून विरोधकांनी भाजपवर निशाणा साधला होता. याच दरम्यान आता भाजप नेते सुब्रमण्यम स्वामी यांचा एक जुना व्हिडीओ सोशल मीडियावर व्हायरल झाला असून त्यात ते ईव्हीएम मशीनला ‘होलसेल फ्रॉड’ म्हणताना दिसत आहेत. हा व्हिडीओ काँग्रेस नेते दिग्विजय सिंग यांनी शेअर करत सुब्रमण्यम स्वामी यांना आजही तुचमा हाच विचार आहे का असा सवाल केला आहे.
Subramanian Swamy ji do you still believe EVM is a “Whole Sale Fraud?” If so would you please join us on our Campaign to go back to Ballot Box? pic.twitter.com/Fb00VXZXRj
— digvijaya singh (@digvijaya_28) April 3, 2021
दिग्विजय सिंग यांनी स्वामींचा तो व्हिडीओ ट्विटरवर शेअर केला आहे. सोबत त्यांनी एक पोस्टही शेअर केली आहे. ‘सुब्रमण्यम स्वामीजी आजही तुम्ही ईव्हीएम बाबत असाच विचार करता का? तुम्हाला आजही वाटतं का की ईव्हीएम होलसेल फ्रॉड आहे? जर तसं असेल तर तुम्ही बॅलोट बॉक्ससाठीच्या आमच्या कॅम्पेनमध्ये आमच्यासोबत येऊ शकता का?’, असे दिग्विजय सिंह यांनी ट्विट केले आहे.
आसाममध्ये दुसऱया टप्प्यातील मतदानादरम्यान भाजप उमेदवाराच्या गाडीतच ईव्हीएम मशीन आढळून आले आहे. याप्रकरणी चार अधिकाऱयांना निलंबित करण्यात आले असून निवडणूक आयोगाने करीमगंज जिल्हा निवडणूक अधिकाऱयांना सविस्तर अहवाल सादर करण्याचे आदेश दिले आहेत.
आसाम विधानसभेच्या 39 जागांसाठी गुरुवारी मतदान पार पडले. मतदानानंतर एक व्हिडीओ सोशल मीडियावर प्रचंड व्हायरल झाला. या व्हिडीओत एका खासगी गाडीत ईव्हीएम मशीन सापडले आहे. धक्कादायक बाब म्हणजे ज्या गाडीमध्ये हे ईव्हीएम मशीन सापडले ती गाडी पाथरकांडी विधानसभा मतदारसंघातून निवडणूक लढवत असलेले भाजपचे उमेदवार कृष्णेंदू पाल यांची असल्याचे समोर आले आहे. याप्रकरणी विरोधकांनी भाजपवर टीका करत निवडणूक आयोगाकडे कारवाईची मागणी केली आहे.
