राष्ट्रीय राजपूत करणी सेनेचे अध्यक्ष सुखदेवसिंह गोगामेडी (Sukhdev Singh Gogamedi) यांच्या हत्या प्रकरणात तिघांना अटक करण्यात आली आहे. दोन हल्लेखोरांसह त्यांच्या एका साथिदाराच्या हरियाणातील चंदीगड येथून मुसक्या आवळण्यात आल्या. दिल्ली पोलीस आणि राजस्थान पोलिसांनी संयुक्तपणे ही कारवाई केली.
दिल्ली पोलिसांनी दिलेल्या माहितीनुसार, सुखदेवसिंह गोगामेडी यांच्यावर हल्ला करणाऱ्या दोघांसह अन्य एकाला चंदीगडमधील एका हॉटेलमधून अटक करण्यात आली आहे. रोहित राठोड, उधम सिंह आणि नितीन फौजी अशी अटक करण्यात आलेल्या आरोपींची नावे आहेत. रोहित आणि नितीन यांनी सुखदेवसिंह गोगामेडी यांच्यावर प्रत्यक्ष हल्ला केला होता. दिल्ली पोलिसांनी रोहित आणि उधमला दिल्लीत आणले असून नितीन फौजी हा राजस्थान पोलिसांच्या ताब्यात आहे. संबंधित आरोपींना पकडण्यासाठी पोलिसांनी 5 लाखांचे बक्षिसही ठेवले होते. अखेर त्यांना अटक करण्यात आली आहे.
दरम्यान, या हत्याकांडात आतापर्यंत चार जणांना अटक करण्यात आली आहे. शनिवारी राजस्थान पोलिसांनी रामवीर जाट याला बेड्या ठोकल्या होत्या. त्याने हल्लेखोर रोहित आणि नितीन यांना घटनास्थळावरून पळून जाण्यासाठी मदत केली होती. त्याने दोघांनाही दुचाकीवरून अजमेर रोडपर्यंत सोडले होते. मात्र चौथा आरोपी उधम याचा या प्रकरणात काय संबंध आहे याचा पोलीस शोध घेत आहेत.
#WATCH | Delhi: The accused in the Sukhdev Singh Gogamedi murder case brought to the Crime Branch Office. https://t.co/oPuhcesScg pic.twitter.com/ynTa1HUkzN
— ANI (@ANI) December 9, 2023
गोगामेडी यांची निर्घृणपणे हत्या केल्यानंतर आरोपींनी शस्त्र लपवून ठेवली आणि राजस्थानमधून हरियाणातील हिसारला पसार झाले. त्यानंतर सर्व आरोपी हिमाचल प्रदेशमधील मनाली येथे गेले. तिथे काही काळ राहिल्यानंतर चंदीगड येथे आले. मात्र मोबाईल लोकेशनद्वारे पोलिसांनी आरोपींचा ठावठिकाणा शोधला आणि त्यांना अटक केली.
मंगळवारी नक्की काय घडले?
सुखदेवसिंह गोगामेडी हे मंगळवारी घरीच होते. दुपारी 1.45च्या सुमारास तीन हल्लेखोर मोटारसायकलवरून आले आणि गोगामेडी यांना भेटण्यासाठी आल्याचे सुरक्षा रक्षकाला सांगितले. सुरक्षा रक्षकाने गोगामेडी यांची भेट घडवून आणली. हल्लेखोर आणि गोगामेडी यांच्यात 10 मिनिटे बातचित झाली. त्यानंतर अचानक हल्लेखोरांनी गोळीबार केला. गोगामेडी यांचा जागीच मृत्यू झाला, तर त्यांच्याबरोबर असलेले अजितसिंह गंभीर जखमी झाले.
