मुंबई-गोवा राष्ट्रीय महामार्गाचे (एनएच-66) सुरू असलेले रुंदीकरणाचे काम या मार्गालगत राहणाऱ्या रहिवाशांसाठी धोकादायक ठरत आहे. अनेक ठिकाणी काम अपूर्ण असल्याने माती उघडी पडली आहे आणि जमिनीचे उतार अस्थिर झाले आहेत. संगमेश्वर नजीकच्या माभळे गावात या कमकुवत भागांची धूप होऊ लागली आहे, ज्यामुळे दरडी कोसळण्याचा आणि घरांचे नुकसान होण्याचा धोका वाढला आहे. येथील वसंत सोमा खापरे यांच्या घराला गंभीर धोका निर्माण झाला आहे. रस्त्याच्या कडेला केलेल्या खोदकामामुळे घराच्या खालचा बराचसा मातीचा भाग आधीच खचला आहे. पाया कमकुवत झाल्यामुळे हे घर असुरक्षित झाले आहे. विशेषतः सततच्या पावसामुळे ते कोणत्याही क्षणी कोसळू शकते, अशी भीती स्थानिकांना वाटत आहे. स्थानिकांनी धूप रोखण्यासाठी उघडा पडलेला भाग प्लॅस्टिकच्या कागदाने झाकणे आणि दगड रचणे यांसारखे तात्पुरते उपाय केले आहेत.
