गाझा शहरातील रिमाल परिसरात सोमवारी झालेल्या इस्रायली हवाई हल्ल्यात शाळेच्या परीक्षेसाठी जात असलेल्या १६ वर्षीय विद्यार्थिनीचा मृत्यू झाला. या घटनेमुळे परिसरात शोककळा पसरली असून युद्धविराम लागू असतानाही गाझामध्ये सुरू असलेल्या हिंसाचाराबाबत चिंता व्यक्त केली जात आहे. पीटीआयने याबाबत वृत्त दिले आहे.
रघद हसन अशूर असे मृत विद्यार्थिनीचे नाव असून ती अकरावीच्या परीक्षेसाठी शाळेत जात होती. त्याचवेळी गजबजलेल्या रस्त्यावर हा स्फोट झाला, अशी माहिती तिचे नातेवाईक जमील अशूर यांनी दिली. या हल्ल्याबाबत इस्रायली लष्कराने स्पष्टीकरण देताना हल्ल्याचे लक्ष्य हमासचा एक दहशतवादी असल्याचे म्हटले आहे. मात्र या कारवाईत एका निष्पाप व्यक्तीला इजा झाल्याच्या दाव्याची माहिती असल्याचेही लष्कराने सांगितले.
रघदचा मृतदेह शिफा रुग्णालयात आणल्यानंतर तिच्या आईसह अनेक नातेवाईक आणि स्थानिक नागरिकांनी रुग्णालयात गर्दी करून शोक व्यक्त केला. पॅलेस्टिनी रेड क्रेसेंट सोसायटीने दिलेल्या माहितीनुसार, याच परिसरातील इतर हल्ल्यांमध्ये आणखी तीन जण जखमी झाले आहेत.
सोशल मीडियावर प्रसारित झालेल्या व्हिडीओंमध्ये हल्ल्यानंतरचे भीषण दृश्य दिसून आले. दोन वाहनांचे मोठे नुकसान झाले असून घटनास्थळी बचाव पथके कार्यरत होती. रस्त्यावर रक्ताचे डागही दिसत होते.
ऑक्टोबरमध्ये झालेल्या युद्धविराम करारानंतरही इस्रायलने गाझामध्ये हवाई हल्ले सुरू ठेवले आहेत. हमास आणि इतर सशस्त्र गटांकडून निर्माण होणाऱ्या धोक्याला प्रत्युत्तर म्हणून या कारवाया केल्या जात असल्याचे इस्रायली लष्कराने म्हटले आहे. तसेच हमासकडून युद्धविरामाचे उल्लंघन होत असल्याचाही आरोप इस्रायलने केला आहे. मात्र या हल्ल्यांमध्ये सामान्य नागरिकांचाही बळी जात असल्याचे समोर आले आहे.
गाझाच्या आरोग्य मंत्रालयाने गेल्या आठवड्यात दिलेल्या माहितीनुसार, युद्धविराम लागू झाल्यापासून इस्रायली कारवायांमध्ये १,००० हून अधिक पॅलेस्टिनी नागरिकांचा मृत्यू झाला आहे. दुसरीकडे, युद्धविरामानंतर पाच इस्रायली सैनिकही ठार झाले आहेत.
७ ऑक्टोबर २०२३ रोजी हमासच्या नेतृत्वाखालील दहशतवाद्यांनी दक्षिण इस्रायलमध्ये घुसून १,२०० लोकांची हत्या केली होती आणि २५१ जणांना ओलीस नेले होते. त्यानंतर इस्रायलने गाझामध्ये व्यापक लष्करी कारवाई सुरू केली.
गाझाच्या आरोग्य मंत्रालयाच्या आकडेवारीनुसार, युद्ध सुरू झाल्यापासून आणि युद्धविरामानंतरच्या मृत्यूंसह इस्रायली कारवायांमध्ये आतापर्यंत ७३,०१८ पॅलेस्टिनी नागरिकांचा मृत्यू झाला आहे.
