आत्रेय समितीने यंदाच्या शिरीष पै पुरस्कारासाठी कर्तृत्ववान उद्योजिका, लेखिका अचला जोशी यांची निवड केली आहे. मानचिन्ह आणि रोख रक्कम 21 हजार रुपये असे या पुरस्काराचे स्वरूप आहे.
दरवर्षी 15 नोव्हेंबर रोजी शिरीष पै जयंती आणि दैनिक मराठा वर्धापनदिन असा संयुक्त कार्यक्रम आत्रेय ही संस्था साजरा करीत असते. यानिमित्त शिरीष पै पुरस्कारांची घोषणा करण्यात येते. यंदा पुरस्कार वितरण सोहळा गुरुवार, 16 नोव्हेंबर रोजी सायंकाळी 5 वाजता यशवंत नाटय़मंदिर, माटुंगा येथे होणार आहे. कार्यक्रमाचे अध्यक्षस्थान ज्येष्ठ पत्रकार महेश म्हात्रे भूषवणार आहेत. यावेळी अचला जोशी यांना हा पुरस्कार एजिल्स रक्तपेढीचे सर्वेसर्वा डॉ. अविनाश फडके यांच्या हस्ते प्रदान करण्यात येणार आहे. या समारंभानंतर आचार्य अत्रे यांच्या 125 व्या जयंती वर्षाचे औचित्य साधून अशोक हांडे प्रस्तुत अत्रे अत्रे सर्वत्रे हा आचार्य अत्रे यांचा जीवनपट मांडणारा संगीतमय कार्यक्रम सादर केला जाणार आहे. कार्यक्रमाच्या विनामूल्य प्रवेशिका उद्या, मंगळवारी यशवंत नाटय़मंदिरात उपलब्ध होतील.
