अयोध्या राम मंदिरातील देणगी घोटाळा प्रकरणी SIT चौकशी करत आहे. आता देशभरात या घोटाळ्याविरोधात वातावरण तापत आहे. त्यातच उत्तर प्रदेश विधानसभेचे अध्यक्ष आणि भाजप आमदार सतीश महाना यांनी या देणगी घोटाळ्याबाबत वादग्र्सत विधान केले आहे. त्यामुळे जनतेतील रोष आणखी वाढला आहे.
महाना म्हणाले की, खऱ्या श्रद्धेने आणि भक्तीने दान दिले नाही, त्यांचीच देणगी चोरली गेली. काँग्रेससह विरोधी पक्षांनी त्यांच्या या वक्तव्यावर तीव्र प्रतिक्रिया व्यक्त केली आहे. महाना यांनी लाखो भक्तांच्या श्रद्धेवर प्रश्नचिन्ह उपस्थित केले आहे, त्याचा निषेध करण्यात येत आहे. त्यामुळे सतीश महाना यांच्या वक्तव्याने राजकीय वातावरण तापले आहे. भक्तांना आरोपीच्या पिंजऱ्यात उभे करण्याऐवजी या प्रकरणाची निष्पक्षपणे चौकशी झाली पाहिजे, अशी मागणी विरोधकांनी केली आहे.
सतीश महाना यांनी राम मंदिरासाठी देणग्यांच्या वापरासंदर्भात ट्रस्ट आणि मंदिराच्या व्यवस्थेवर विश्वास व्यक्त केला. ते म्हणाले की, भक्तांनी दिलेल्या देणग्या मंदिराच्या बांधकाम आणि विकास कामांसाठी वापरल्या गेल्या आहेत. राम मंदिराचे भव्य स्वरूप हेच सिद्ध करते की देणग्यांचा सुज्ञपणे वापर केला गेला आहे. देशभरातील कोट्यवधी लोकांनी आपल्या भक्तीने मंदिराच्या उभारणीसाठी योगदान दिले आहे आणि त्याचे परिणाम आज सर्वांना दिसत आहेत. मंदिरातील विकासकामांमुळे देणग्यांच्या वापराबाबत कोणतीही शंका राहू नये, असेही ते म्हणाले.
विरोधी पक्षाने अध्यक्षांच्या वक्तव्यावर तीव्र टीका केली आहे. काँग्रेसचे प्रवक्ते सुरेंद्र राजपूत म्हणाले की, असे वक्तव्य म्हणजे भक्तांना जबाबदार धरण्याचा प्रयत्न आहे. देणग्यांबाबत कोणताही वाद निर्माण झाला असेल, तर प्रश्न विचारणाऱ्या भक्तांच्या हेतूंवर भाष्य करण्याऐवजी त्याची निष्पक्षपणे चौकशी केली पाहिजे. कोट्यवधी रामभक्तांच्या श्रद्धेशी संबंधित बाबींमध्ये जबाबदारी निश्चित करण्याऐवजी व्यक्तींनाच आरोपीच्या पिंजऱ्यात उभे केले जात आहे.
कोणत्याही अनियमिततेच्या किंवा आर्थिक अनियमिततेच्या तक्रारी असल्यास, संबंधित यंत्रणांनी पारदर्शक चौकशी करावी आणि दोषी आढळलेल्यांवर कठोर कारवाई करावी. काँग्रेस पक्षाने असेही म्हटले आहे की, राम मंदिर हे लाखो लोकांसाठी श्रद्धेचे केंद्र आहे. त्यामुळे, या विषयावर सार्वजनिक वक्तव्ये संवेदनशीलतेने केली पाहिजेत. विरोधी पक्षाने विधानसभा अध्यक्षांना आपल्या वक्तव्याचा पुनर्विचार करण्याचे आणि भक्तांच्या भावनांचा आदर करण्याचे आवाहन केले.
