हिंदुस्थानने तिसऱया दिवशीही आपले वर्चस्व राखत श्रीलंकेला बॅकफूटवर ढकलले आहे. पण तरीही यावेळी सोनल दिनुशा हा डोकेदुखी बनून राहिला. तिसऱ्या दिवसाचा खेळ थांबला तेव्हा दिनुशा 85 धावांवर नाबाद राहून एकाकी झुंज देत होता. हिंदुस्थानच्या 503 धावांपेक्षा श्रीलंका अजूनही 238 धावांनी पिछाडीवर असून त्यांच्या हातात केवळ दोन बळी शिल्लक आहेत. तिसऱ्या दिवसअखेर श्रीलंकेची 8 बाद 265 अशी स्थिती आहे आणि दिनुशासोबत खेळपट्टीवर होता लाहिरू kgमारा. हिंदुस्थानकडून प्रसिध कृष्णा आणि मानव सुथार यांनी सातत्यपूर्ण कामगिरी करत प्रत्येकी तीन विकेट्स मिळवले. हिंदुस्थानला श्रीलंकेवर फॉलोऑन लादण्यासाठी संधी आहे, पण त्यासाठी 38 धावांत त्यांना दोन विकेट्स घ्यावा लागतील.
श्रीलंकेला एकापाठोपाठ एक धक्के
श्रीलंकेसाठी दिवसाची सुरुवात वाईट झाली. कारण 2 बाद 8 या धावसंख्येवरून त्यांनी तिसऱया दिवसाची सुरुवात केली. त्यानंतर कामिल मिश्रा 19 धावांवर प्रसिध कृष्णाच्या गोलंदाजीवर बाद झाला, तर कर्णधार धनंजय डिसिल्व्हादेखील केवळ 8 धावांवर स्वस्तात बाद झाला. कामिंदू मेंडिसने 32 धावांचे योगदान दिले, पण त्याला आपल्या खेळीचे मोठय़ा धावसंख्येत रूपांतर करता आले नाही आणि निरोशन डिकवेला शून्यावर बाद झाला. त्यामुळे श्रीलंकेला एकामागून एक असे धक्के बसत गेले आणि त्यांची बिकट अवस्था झाली.
पसिंदू आणि सोनलने संघाला सावरले
सुरुवातीच्या धक्क्यांनंतर पसिंदू सुरियाबंदारा आणि सोनल दिनुशा यांनी श्रीलंकेच्या संघाला सावरण्याचे काम चोख बजावले. सुरियाबंदाराने 133 चेंडूंमध्ये 9 चौकारांसह झुंजार 80 धावा केल्या. तो शतकाच्या समीप आला होता, पण तो रवींद्र जडेजाच्या गोलंदाजीवर त्रिफळाचीत झाला. दुसऱया टोकाला सोनल दिनुशाने शानदार फलंदाजी करत 137 चेंडूंमध्ये 6 चौकार आणि 2 षटकारांच्या मदतीने 85 धावा केल्या आणि दिवसाचा खेळ संपेपर्यंत तो खेळपट्टीवर टिकून राहिला. दिनुशाचे हे या मालिकेतील तिसरे अर्धशतक होते. श्रीलंकेच्या संपूर्ण डावात जिद्दीचा अभाव दिसून आला.
हिंदुस्थान मोठी आघाडी घेण्यासाठी प्रयत्नशील
तिसऱया दिवसाचा खेळ संपला तेव्हा लाहिरू कुमार सोनल दिनुशासोबत (85) खेळत होता, जो 8 धावांवर आहे. भारतीय संघ चौथ्या दिवशी सकाळी श्रीलंकेच्या उर्वरित दोन विकेट लवकरात लवकर घेऊन मोठी आघाडी घेण्याच्या आणि सामन्यावरील आपली पकड पूर्णपणे घट्ट करण्याच्या उद्देशाने मैदानात उतरेल. त्याचबरोबर श्रीलंकेचे दोन विकेट्स 38 धावांत घेत हिंदुस्थान श्रीलंकेवर फॉलोऑन लादतो का, याची उत्सुकताही सर्वांना असेल.
हिंदुस्थानच्या गोलंदाजांची अप्रतिम कामगिरी
हिंदुस्थानच्या गोलंदाजांनी दिवसभर शिस्तबद्ध गोलंदाजी करत श्रीलंकेवर दबाव कायम ठेवला. वेगवान गोलंदाज प्रसिध कृष्णाने 14 षटकांत 47 धावा देऊन 3 महत्त्वपूर्ण बळी घेतले, तर फिरकी गोलंदाज मानव सुथारनेही 21 षटकांत 83 धावा देऊन 3 बळी घेतले. मोहम्मद सिराज आणि रवींद्र जाडेजा यांनी प्रत्येकी 1 बळी घेतला, तर सारांश जैन एकही बळी घेऊ शकला नाही.
