हिंदुस्थानी क्रिकेट नियामक मंडळाने (बीसीसीआय) बुधवारी जाहीर केले की, महिला प्रीमियर लीगचा (डब्ल्यूपीएल) पाचवा हंगाम 14 जानेवारी ते 7 फेब्रुवारी 2027 दरम्यान खेळवला जाणार आहे. या लीगसाठी खेळाडूंचा लिलाव 28 ऑक्टोबरला कोची येथे होईल. पण बीसीसीआयने अद्याप डब्ल्यूपीएलसाठी यजमान शहरांची घोषणा केलेली नाही.
खेळाडू कायम ठेवण्याची तारीख जाहीर
खेळाडू कायम ठेवण्याची अंतिम मुदत 28 सप्टेंबर निश्चित करण्यात आली आहे. बीसीसीआयने सांगितले की, सर्व पाच फ्रँचायझींना त्यांच्या सध्याच्या संघांमधून खेळाडू कायम ठेवण्याची संधी मिळेल. यासह ते या हंगामासाठी त्यांच्या संघाची रचना अंतिम करण्याची प्रक्रिया सुरू करतील.
आतापर्यंत मुंबई आणि बंगळुरूने ट्रॉफी जिंकली आहे
आतापर्यंत डब्ल्यूपीएलचे चार हंगाम खेळले गेले असून दोन संघांनी दोनदा ट्रॉफी जिंकली आहे. मुंबई इंडियन्सने पहिला हंगाम जिंकला, तर रॉयल चॅलेंजर्स बंगळुरूने 2024 चे विजेतेपद पटकावले. यानंतर मुंबईने 2025 मध्ये पुन्हा विजेतेपद पटकावले आणि बंगळुरूने 2026 मध्ये पुन्हा विजेतेपद मिळवले.
डब्ल्यूपीएलची ठिकाणे अद्याप निश्चित नाहीत
या लीगची ठिकाणे अद्याप निश्चित झालेली नाहीत. मागील हंगाम मुंबई, वडोदरा आणि बंगळुरू येथे खेळवला गेला होता. पण पुढील हंगामासाठी ठिकाणे बदलू शकतात. बीसीसीआयच्या सूत्रांनी दिलेल्या माहितीनुसार वाराणसीच्या गंजारी येथे बांधण्यात येत असलेल्या नवीन स्टेडियममध्ये डब्ल्यूपीएलचे सामने आयोजित केले जाऊ शकतात. पण सुरुवातीला तेथे रणजी ट्रॉफीचे सामनेदेखील आयोजित केले जाण्याची शक्यता आहे. त्यानंतर या लीगचे सामने खेळवणे सोपे होऊ शकते.
