पश्चिम बंगालमधील श्रीरामपूर कोर्ट मैदानावर आयोजित करण्यात आलेल्या रॅलीपूर्वी तृणमूल काँग्रेसच्या अध्यक्षा ममता बॅनर्जी यांनी भाजपवर गंभीर आरोप केले आहेत. भाजपने आपल्याला रॅलीच्या ठिकाणी जाऊ न दिल्याचे सांगत, “मला नजरकैदेत ठेवण्यात आले असून घराबाहेर पडू दिले जात नाही,” असा संताप त्यांनी व्यक्त केला.
एबीपी न्यूजने दिलेल्या वृत्तानुसार, या रॅलीत सहभागी होण्यासाठी जात असलेले तृणमूल काँग्रेसचे आमदार कुणाल घोष यांच्या गाडीवर वाटेत अंडी आणि दगडफेक करण्यात आली. या घटनेचा तीव्र निषेध करत ममता बॅनर्जी म्हणाल्या, “भाजपच्या गुंडांनी श्रीरामपूरमध्ये तृणमूलच्या रॅलीच्या ठिकाणाकडे जाणाऱ्या रस्त्यावर कब्जा केला आहे आणि तिथे पोलीसही उपस्थित नाहीत. आमच्या लोकांना वाटेत अडवून त्यांना बेदम मारहाण केली जात आहे. आमदार कुणाल घोष यांची गाडी फोडण्यात आली असून ते गंभीर जखमी झाले आहेत.”
यावेळी त्यांनी शांततेचे आवाहन करत कार्यकर्त्यांना सहकार्य करण्याची आणि राज्यात अशांतता न पसरवण्याची विनंती केली. प्रशासनावर ताशेरे ओढताना ममता बॅनर्जी पुढे म्हणाल्या, “गेले १५ दिवस न्यायालयात लढा दिल्यानंतर आम्हाला आज ही सभा घेण्याची परवानगी मिळाली आहे. असे असतानाही आम्हाला घराबाहेर पडू दिले जात नाहीये. त्यांनी आम्हाला जवळपास नजरकैदेत ठेवले आहे. आफ्रिकन देशांमध्येही असे घडत नाही. गुंडांच्या मदतीने त्यांनी संपूर्ण रस्ता जाम केला आहे. पण मी स्वतः आता घटनास्थळी जाणार आहे, मला अडवून दाखवाच.”
दरम्यान, श्रीरामपूर कोर्ट मैदानावर आयोजित या सभेला सुरुवातीला पोलिसांनी परवानगी नाकारली होती. ज्यानंतर हे प्रकरण कलकत्ता उच्च न्यायालयात गेले. न्यायालयाने शनिवारी (२६ सप्टेंबर) सायंकाळी ४ ते ६ या वेळेत श्रीरामपूर कोर्ट मैदानावर जास्तीत जास्त १,००० लोकांच्या उपस्थितीत सभा घेण्यास परवानगी दिली.
