पंजाबमध्ये नुकत्याच झालेल्या सीबीआयच्या १२ तासांच्या छाप्यांवरून राज्याचे मुख्यमंत्री भगवंत मान यांनी भाजपवर सडकून टीका केली आहे. या कारवाईत तपास यंत्रणांच्या हाती काहीही लागले नसून अधिकारी रिकाम्या हाताने परतले असल्याचा दावा मान यांनी केला आहे. संपूर्ण राज्यात मोठी शोधमोहीम राबवूनही सीबीआयला काहीही न मिळणे, हा आमच्या राज्य सरकारच्या प्रामाणिकपणाचा आणि स्वच्छ कारभाराचा स्पष्ट पुरावा असल्याचे त्यांनी म्हटले आहे. टीव्ही९ भारतवर्षने यासंदर्भात वृत्त दिले आहे.
आगामी पंजाब विधानसभा निवडणुकांच्या पार्श्वभूमीवर राजकीय सूडबुद्धीतून आणि निवडून आलेल्या सरकारची व मुख्यमंत्र्यांची प्रतिमा मलिन करण्यासाठी भाजपकडून केंद्रीय तपास यंत्रणांचा गैरवापर केला जात असल्याचा आरोप त्यांनी केला. मान म्हणाले की, निवडणुका जवळ आल्या की ज्या राज्यांमध्ये भाजपला राजकीय आव्हान असते, तिथेच असा खेळ खेळला जातो. दिल्ली, छत्तीसगड, पश्चिम बंगाल आणि हरियाणामध्येही निवडणुकांच्या तोंडावर केंद्रीय यंत्रणा अचानक सक्रिय झाल्याचे त्यांनी निदर्शनास आणून दिले. आम्ही येथे पैसे कमावण्यासाठी नव्हे, तर पंजाबची सेवा करण्यासाठी आलो आहोत. अशा भ्याड कारवायांना आणि धमक्यांना आम्ही कधीही घाबरणार नाही किंवा त्यांच्यापुढे झुकणार नाही, असे मान यांनी म्हटले आहे.
भाजपवर निशाणा साधताना मान यांनी शेतकरी आंदोलनाचाही उल्लेख केला. काळ्या कृषी कायद्यांविरोधात झालेल्या आंदोलनात प्राण गमावलेल्या ७०० हून अधिक शेतकऱ्यांच्या मृत्यूला भाजपच जबाबदार असल्याचा घणाघात त्यांनी केला. यासोबतच भाखडा बियास मॅनेजमेंट बोर्ड, एसवायएल कालवा आणि आरडीएफ फंडासारख्या मुद्द्यांवरून भाजपने नेहमीच पंजाबवर अन्याय केल्याचे ते म्हणाले.
