दमदार अभिनय आणि प्रभावी संवादफेकीसाठी प्रसिद्ध असलेले नाना पाटेकर त्यांच्या स्पष्टवक्तेपणा आणि साधेपणासाठीही तितकेच ओळखले जात होते. अभिनयाच्या क्षेत्रात मोठं यश मिळाल्यानंतरही त्यांनी स्वतःच्या मर्यादा कधी लपवल्या नाहीत. प्रसिद्धीच्या झोतात असूनही आपण मुळात कसे आहोत, हे त्यांनी अनेकदा अगदी स्पष्टपणे सांगितलं.
एका जुन्या मुलाखतीत नाना पाटेकर यांनी आपल्या इंग्रजी भाषेतील मर्यादा आणि निसर्गाशी असलेल्या जवळिकीबद्दल मनमोकळेपणाने भाष्य केलं होतं. “मला पर्वत, नद्या आणि समुद्र आवडतात. मी तसाच आहे. मी फारसा सुसंस्कृत किंवा दिखाऊ नाही. मला इंग्रजी अस्खलितपणे बोलता येत नाही. माझ्याकडे तितका शब्दसंग्रह आणि प्रवाहीपणा नाही. त्यामुळे मला माझ्या मर्यादा माहीत आहेत,” असं ते म्हणाले होते.
इंग्रजी अस्खलितपणे बोलता येत नसलं तरी गरजेपुरतं संवाद साधता येत असल्याचंही त्यांनी स्पष्ट केलं होतं. मात्र, भाषेचं कौशल्य किंवा दिखाऊपणापेक्षा स्वतःशी प्रामाणिक राहणं त्यांच्यासाठी अधिक महत्त्वाचं होतं. नाना पाटेकर यांच्या या वक्तव्यातून त्यांच्या व्यक्तिमत्त्वातील एक महत्त्वाचा पैलू समोर येतो. राष्ट्रीय पुरस्कारासह अनेक सन्मान मिळवूनही त्यांनी स्वतःला कधीही मोठं दाखवण्याचा प्रयत्न केला नाही. उलट, “मला माझ्या मर्यादा माहीत आहेत,” असं स्पष्टपणे सांगत त्यांनी आपल्या साधेपणाचीच ओळख जपली.
रुपेरी पडद्यावर मोठमोठ्या व्यक्तिरेखा साकारणारा हा अभिनेता प्रत्यक्ष आयुष्यात मात्र स्वतःच्या मातीशी आणि साधेपणाशी जोडलेला राहिला. त्यांच्या अभिनयाइतकाच त्यांचा हा साधा, स्पष्ट आणि मनमोकळा स्वभावही चाहत्यांच्या स्मरणात कायम राहणार आहे.
