तृणमूल काँग्रेसमध्ये निर्माण झालेल्या बंडखोरीच्या पार्श्वभूमीवर आम आदमी पक्षाचे राज्यसभा खासदार संजय सिंह यांनी भारतीय जनता पक्षावर गंभीर आरोप केले आहेत. विरोधी पक्षांमध्ये फूट पाडण्यासाठी भाजप अंमलबजावणी संचालनालय (ईडी), केंद्रीय अन्वेषण विभाग (सीबीआय) आणि इतर तपास यंत्रणांचा वापर करत असल्याचा आरोप त्यांनी केला.
तृणमूल काँग्रेसच्या 58 आमदारांनी पक्ष नेतृत्वाविरोधात बंड पुकारून तृणमूल काँग्रेस विधिमंडळ पक्षावर दावा केल्यानंतर पत्रकारांशी बोलताना संजय सिंह म्हणाले, “भाजपची कार्यपद्धती म्हणजे विरोधी पक्षांमध्ये फूट पाडणे. ईडी, सीबीआय आणि इतर तपास यंत्रणांच्या माध्यमातून दबाव टाकून पक्ष तोडण्याचा खेळ देशात सुरू आहे.”
ते पुढे म्हणाले, “भाजपने शिवसेना फोडली, राष्ट्रवादी काँग्रेस पक्षात फूट पाडली, अरुणाचल प्रदेश आणि उत्तराखंडमध्ये काँग्रेसमध्ये फूट पाडली. गोवा, कर्नाटक आणि मध्य प्रदेशमध्येही काँग्रेसचे नुकसान केले. आम आदमी पक्षालाही त्यांनी लक्ष्य केले आणि पक्षात फूट पाडण्याचा प्रयत्न केला.”
देशातील विविध पक्षांमध्ये फूट पाडून भाजपला सत्तेवर कायम राहायचे असल्याचा आरोप करत संजय सिंह म्हणाले, “सर्व पक्ष तोडून देशावर राज्य करण्याचा त्यांचा प्रयत्न आहे. यावरचा खरा उपाय जनतेकडेच आहे. जनतेने योग्य वेळी त्यांना सडेतोड उत्तर द्यावे, हाच एकमेव मार्ग आहे.”
