दिल्ली पोलिसांच्या गुन्हे शाखेने कर्करोगाच्या (कॅन्सरच्या) महागड्या औषधांचा काळाबाजार करणाऱ्या एका मोठ्या रॅकेटचा पर्दाफाश केला आहे. या कारवाईत पोलिसांनी सुमारे 9 कोटी रुपयांच्या बनावट औषधांसह 17 जणांना अटक केली आहे. आरोपींकडून 588 कर्करोगविरोधी घटकांच्या युनिट्स, 3 हजारहून अधिक इतर औषधांच्या युनिट्स आणि सुमारे 50 लाख रुपयांची रोकड जप्त करण्यात आली आहे.
या काळ्या बाजारात रुग्णांना तब्बल एक-एक लाख रुपयांना विकल्या जाणाऱ्या ‘एवालुमैब’ इंजेक्शनमध्ये प्रत्यक्षात फक्त पाणी भरलेले असल्याचे तपासात निष्पन्न झाले आहे. औषध बनवणाऱ्या कंपनीमार्फत जर्मनीच्या मर्क लॅबमध्ये केलेल्या तपासणीत या औषधांमध्ये कर्करोगाशी लढणारा मूळ घटक शून्य असल्याचे समोर आले आहे.
पोलिसांच्या मते, राजस्थान सरकारच्या योजनेअंतर्गत कर्करोग रुग्णांसाठी पुरवल्या जाणाऱ्या औषधांची देखील यात काळाबाजार करून विक्री केली जात होती. हा संपूर्ण रॅकेट दिल्ली-एनसीआर, मुंबई, हैदराबाद, हरयाणा आणि उत्तर प्रदेशसह 7 राज्यांत पसरलेला होता. गेल्या 22 जूनपासून मिळालेल्या गुप्त माहितीच्या आधारे पोलिसांनी ही धडक कारवाई केली आहे.
आरोपी लोक बनावट औषधांची रीपॅकिंग करण्यासाठी औषधांचे मूळ बॉक्स आणि कार्टर सुरक्षित ठेवत असत. त्यानंतर एसीटोनसारख्या रसायनांचा वापर करून जुना बॅच नंबर आणि एमआरपी मिटवली जात असे आणि नवीन पॅकिंग तयार केली जात होती. या रॅकेटमध्ये लक्ष्मी नगरचा अभिषेक वैश्य, शुभम कुमार चौधरी, सूरज चौधरी यांच्यासह नोएडा, फरीदाबाद आणि गुरुग्राममधील अनेक संशयित सामील असल्याचे उघड झाले आहे.
याप्रकरणी गुन्हे शाखेच्या पोलिस ठाण्यात एफआयआर दाखल करण्यात आला असून हा अवैध कारभार नेमका किती काळापासून सुरू होता आणि यात आणखी कोणा-कोणाचा सहभाग आहे, याचा कसून शोध घेतला जात आहे.
