गॉल येथील आंतरराष्ट्रीय स्टेडियमवर सुरू असलेल्या पहिल्या कसोटी सामन्यावर टीम इंडियाने मजबूत पकड निर्माण केली आहे. पावसाच्या व्यत्ययामुळे सामना लवकर थांबवण्यात आला असला तरी टीम इंडियाने फलंदाजी आणि गोलंदाजी दोन्ही आघाड्यांवर दमदार कामगिरी करत श्रीलंकेला बॅकफुटवर ढकललं आहे. टीम इंडियाने आपल्या पहिल्या डावात 462 धावांचा डोंगर उभा केला होता. या विशाल धावसंख्येचा पाठलाग करताना श्रीलंकेचा पहिला डाव 284 धावांमध्ये आटोपला. त्यामुळे टीम इंडियाकडे पहिल्या डावाच्या आधारे 178 धावांची भक्कम आघाडी आहे.
श्रीलंकेच्या डावाची सुरुवात अतिशय खराब झाली, जिथे वेगवान गोलंदाज मोहम्मद सिराजने डावाच्या दुसऱ्याच चेंडूवर निशाण मदुष्काला बाद केले. त्यानंतर फिरकीपटू मानव सुथारने प्रभावी गोलंदाजी करत एकापाठोपाठ एक 3 महत्त्वाचे गडी बाद करून श्रीलंकेच्या डावाला खिंडार पाडले. श्रीलंकेकडून सोनल दिनुषाने 101 चेंडूत शानदार शतक झळकावले, तर निरोशन डिकवेलाने 80 धावांची महत्त्वपूर्ण खेळी केली. मात्र, टीम इंडियाच्या गोलंदाजांच्या शिस्तबद्ध माऱ्यापुढे श्रीलंकेचा डाव 284 धावांवर संपुष्टात आला. टीम इंडियाकडून मानव सुथारने सर्वाधिक विकेट घेतल्या, तर कुलदीप यादव, रवींद्र जडेजा आणि प्रसिद्ध कृष्णा यांनीही मोलाची साथ दिली.
कपिल देव, बॉथमच्या पंगतीत ‘सर’ जडेजा! 90 व्या कसोटी सामन्यांतच पठ्ठ्याने इतिहास रचला
तत्पूर्वी, टीम इंडियाच्या पहिल्या डावात देवदत्त पडिक्कलने आपल्या कसोटी कारकिर्दीतील पहिले शतक ठोकत 230 चेंडूत 167 धावांची ऐतिहासिक खेळी केली. त्याला सलामीवीर केएल राहुल (82 धावा) आणि यष्टीरक्षक फलंदाज ध्रुव जुरेल (51 धावा) यांनी उत्तम साथ दिली. दरम्यान, खराब हवामान आणि पावसामुळे या सामन्यात आतापर्यंतचा खेळ बऱ्यापैकी प्रभावित झाला असून केवळ 116 षटकांचा खेळ होऊ शकला आहे. त्यामुळे हवामानाचा अंदाज पाहता सामन्याचा निकाल लागणे कठीण दिसत असले, तरी टीम इंडियाकडे 178 धावांची मोठी आघाडी असल्याने सामन्यावर हिंदुस्थानची पकड मजबूत आहे.
