लखनौहून सौदी अरेबियाला जाणाऱ्या इंडिगोच्या विमानाला बॉम्बची धमकी मिळाल्याने अहमदाबाद विमानतळावर आपत्कालीन लँडिंग करण्यात आले. अहमदाबाद विमानतळावर उतरल्यानंतर विमानाची कसून तपासणी करण्यात आली. तपासणीत कोणतीही संशयास्पद वस्तू आढळली नाही.
इंडिगोचे 6E 97 हे विमान गुरुवारी लखनौहून सौदी अरेबियातील दम्मामला चालले होते. या विमानात 107 प्रवासी आणि सहा कर्मचारी होते. दुपारी 4.17 वाजता विमान लखनौहून निघाले. यानंतर विमानातील एका कर्मचाऱ्याला बॉम्ब (BOMB) असे लिहिलेला एक कागदाचा तुकडा आढळला. यानंतर सुरक्षा यंत्रणांना तात्काळ सतर्क करण्यात आले.
बॉम्बची धमकी मिळाल्यानंतर अहमदाबाद विमानतळावर सायंकाळी 5.43 वाजता विमानाचे आपत्कालीन लँडिंग करण्यात आले. सर्व प्रवासी आणि कर्मचाऱ्यांना विमानातून सुरक्षितपणे बाहेर काढून टर्मिनल 2 मध्ये नेण्यात आले.
विमान अहमदाबाद विमानतळावर उतरताच विमानतळ सुरक्षा अधिकाऱ्यांनी बॉम्ब पथक, विशेष कृती महानिरीक्षक (SOG), स्थानिक पोलीस आणि सीआयएसएफ (CISF) यांच्यासह विमानाची तपासणी सुरू केली. तपासणीत विमानात कोणतीही संशयास्पद वस्तू किंवा स्फोटके आढळली नाहीत. सुरक्षा यंत्रणांना विमानात काहीही संशयास्पद न आढळल्याने, त्यांनी विमानात असलेल्या सर्व प्रवाशांकडून टिश्यू पेपरवर हस्ताक्षराचे नमुने गोळा करण्यास सुरुवात केली आहे.
