मणिपूरमधील विविध प्रतिबंधित संघटनांमध्ये भरती करणे आणि खंडणी वसुलीत कथित सहभाग असल्याप्रकरणी सुरक्षा दलांनी तीन जिल्ह्यांमधून चार संशयितांना अटक केली आहे, अशी माहिती पोलिसांनी शुक्रवारी दिली. गुरुवारी काकचिंग जिल्ह्यातील खुनौ उमाथेल मथक लैकाई या त्याच्याच परिसरातून प्रतिबंधित ‘सोरेपा’ संघटनेच्या एका सदस्याला ताब्यात घेण्यात आले, असे पोलिसांच्या निवेदनात म्हटले आहे.
थौबाल जिल्ह्यातील वांगजिंग साबल लैकाई येथून गुरुवारी बेकायदेशीर ‘केवायकेएल’ संघटनेच्या एका सक्रिय कार्यकर्त्याला अटक करण्यात आली, असे त्यात नमूद केले आहे. पूर्व इम्फाळमधील टॉप माखा या त्याच्याच परिसरातून बुधवारी प्रतिबंधित ‘प्रिपाक (प्रो)’ संघटनेच्या एका भरती करणाऱ्या व्यक्तीला ताब्यात घेण्यात आले, असे पोलिसांनी सांगितले. थौबाल जिल्ह्यातील याइरीपोक येथून बुधवारी प्रतिबंधित ‘एनआरएफएम’ संघटनेच्या एका सक्रिय कार्यकर्त्याला पकडण्यात आले, असे या निवेदनात म्हटले असून त्याच्या ताब्यातून एक पिस्तूल आणि तीन जिवंत काडतुसे भरलेली मॅगझिन जप्त करण्यात आली आहे.
दरम्यान, गुरुवारी पश्चिम इम्फाळ जिल्ह्यातील लामसांग पोलीस ठाण्याच्या हद्दीतील फायेंग आणि खारंग कोइरेंग तायरेनपोकपी दरम्यानच्या भागातून सुरक्षा दलांनी शस्त्रे आणि दारूगोळ्याचा साठा जप्त केला, असे त्यात म्हटले आहे. या कारवाईदरम्यान तीन रायफल, एक ९ मिमी पिस्तूल, चार मॅगझिन आणि दारूगोळा जप्त करण्यात आला. दोन वर्षांपूर्वी वांशिक हिंसाचार उसळल्यापासून सुरक्षा दल मणिपूरमध्ये सातत्याने शोध मोहीम राबवत आहेत. मे २०२३ पासून मैतेई आणि कुकी-जो समुदायांमध्ये झालेल्या वांशिक संघर्षामध्ये २६० हून अधिक लोकांचा मृत्यू झाला आहे तर हजारो लोक बेघर झाले आहेत.
