विधान परिषदेच्या 11 स्थानिक स्वराज्य संस्था मतदारसंघांच्या जागांसाठी आज अत्यंत चुरशीच्या आणि शांततापूर्ण वातावरणात मतदान प्रक्रिया पार पडली. या निवडणुकीत विक्रमी 99.79 टक्के मतदान झाले. काही जिल्ह्यांमध्ये मतदारांनी शंभर टक्के मतदानाचा हक्क बजावला.
सद्य राजकीय घडामोडींच्या पार्श्वभूमीवर सर्वच मतदान केंद्रांवर चोख बंदोबस्त ठेवण्यात आला होता. सकाळी 8 वाजता मतदानाला सुरुवात झाली. अनेक संवेदनशील आणि प्रतिष्ठेच्या जागांवर मतदारांनी सकाळपासूनच मतदान केंद्रांवर रांगा लावल्या होत्या.
नाशिक आणि भंडारा-गोंदिया या मतदारसंघांमध्ये तब्बल 100 टक्के मतदान झाले असून तेथील सर्वच मतदारांनी प्रक्रियेत सक्रिय सहभाग नोंदवला. नांदेड विधान परिषद निवडणुकीत जवळपास शत-प्रतिशत म्हणजेच 99.78 टक्के मतदान झाले. येथील 8 पैकी 7 केंद्रांवर पूर्ण 100 टक्के मतदान पार पडले.
सोलापूर जिल्ह्यात 99.68 टक्के, बीडमध्ये 99.49 टक्के, तर परभणी जिल्ह्यात 99.78 टक्के, सांगली-सातारा मतदारसंघात 99.89 टक्के, तर छत्रपती संभाजीनगर-जालना मतदारसंघात 98.90 टक्के इतके मतदान झाले. जळगाव विधान परिषद निवडणुकीत 97.78 टक्के मतदान झाले. विधान परिषदेवर आपला लोकप्रतिनिधी निवडण्यासाठी मतदारांमध्ये कमालीची जागरूकता दिसून आली.
विदर्भात नागपूर स्थानिक प्राधिकारी मतदारसंघाच्या पोटनिवडणुकीत 98.44 टक्के मतदान झाले. येथील 836 मतदारांपैकी 823 जणांनी आपले लोकशाही कर्तव्य पार पाडले. अमरावतीमध्ये 94.68 टक्के मतदान झाले. परभणी-हिंगोली स्थानिक प्राधिकारी मतदारसंघात एकूण 99.79 टक्के इतके मतदान नोंदवले गेले. या सर्व जागांची मतमोजणी आणि अधिकृत निकाल 22 जून 2026 रोजी जाहीर केला जाणार आहे.
