काकडी हा आहाराचा महत्त्वाचा भाग मानला जातो. शरीराला थंडावा देणे, पाण्याची कमतरता भरून काढणे आणि पचनक्रिया सुधारण्यास मदत करणे यांसाठी काकडी उपयुक्त ठरते. मात्र, अनेकदा बाजारातून आणलेली काकडी कडू निघाल्याने तिची चव बिघडते. त्यामुळे काकडी खरेदी करताना काही गोष्टींकडे लक्ष दिल्यास कडू काकडी निवडण्याची शक्यता कमी होऊ शकते.
काकडी कडू आहे की नाही, हे कसे ओळखाल?
ताजी आणि चांगल्या प्रतीची काकडी साधारणपणे फिकट ते गडद हिरव्या रंगाची आणि चमकदार दिसते. खूप पिवळसर किंवा पांढरट काकडी जुनी किंवा कडू असण्याची शक्यता असते.
गुळगुळीत साल आणि स्पष्ट हिरव्या रेषा असलेली काकडी निवडा. डाग पडलेली, सुरकुतलेली किंवा खूप खरखरीत साल असलेली काकडी टाळा.
काकडी हातात घेऊन हलक्या दाबाने तपासा. ती खूप कडक किंवा खूप मऊ वाटत असल्यास ती जास्त पिकलेली किंवा खराब असू शकते.
मध्यम आकाराची, सरळ आणि सडपातळ काकडी निवडणे अधिक योग्य ठरते. अतिशय मोठ्या काकड्यांमध्ये बिया जास्त असू शकतात आणि त्या कडू लागण्याची शक्यता वाढते.
काकडीचा देठ हिरवा आणि ताजा दिसत असेल तर ती ताजी असल्याचे लक्षण मानले जाते. सुकलेला किंवा काळवंडलेला देठ काकडी जुनी झाल्याचे संकेत देऊ शकतो.
काकडी खाण्याचे फायदे
काकडीमध्ये पाण्याचे प्रमाण खूप जास्त असते. त्यामुळे उन्हाळ्यात शरीरातील पाण्याची पातळी संतुलित ठेवण्यास मदत होते.
कॅलरीज कमी आणि पाण्याचे प्रमाण जास्त असल्याने काकडी खाल्ल्याने पोट भरल्यासारखे वाटते, ज्यामुळे जास्त खाणे टाळता येते.
नियमित काकडी सेवन केल्याने शरीर हायड्रेट राहते आणि त्वचेचा तजेला टिकून राहण्यास मदत होते.
काकडीतील फायबर पचनसंस्थेला चालना देते आणि बद्धकोष्ठतेसारख्या समस्यांपासून आराम मिळवून देऊ शकते.
काकडी शरीरातील अनावश्यक द्रव्ये बाहेर टाकण्यास मदत करते. तसेच त्यातील पोटॅशियम रक्तदाब नियंत्रित ठेवण्यासाठी उपयुक्त ठरू शकते.
घामामुळे शरीरातील पाणी कमी होते. अशावेळी काकडीचे सेवन केल्यास शरीराला नैसर्गिकरित्या हायड्रेशन मिळते.
