बॉलिवूडचे दिग्गज अभिनेते देव आनंद यांचा मुलगा सुनील आनंद यांचे निधन झाले आहे. लंडनमध्ये वयाच्या ७० व्या वर्षी त्यांनी अखेरचा श्वास घेतला. हृदयविकाराचा झटक्याने त्याचे निधन झाले आहे. देव आनंद यांची नात, जीना नारंग यांनी एक निवेदन जारी करून सुनील आनंद यांच्या निधनाची पुष्टी केली आहे.
जड अंतःकरणाने, आमचे कुटुंब सुनील आनंद यांच्या निधनाबद्दल शोक व्यक्त करत आहे. या कठीण काळात आम्हाला मिळालेल्या प्रेमाबद्दल, प्रार्थनांबद्दल आणि पाठिंब्याबद्दल आम्ही आभारी आहोत. आम्ही सर्वांना विनंती करतो की या कठीण काळात आमच्या कुटुंबाच्या गोपनीयतेचा आदर करावा, असे त्यांनी निवेदनात म्हटले आहे.
देव आनंद यांचे पुत्र, सुनील आनंद, यांनीही अभिनय क्षेत्रात काम केले आहे. त्यांनी १९८४ मध्ये ‘आनंद और आनंद’ या चित्रपटाद्वारे बॉलिवूडमध्ये पदार्पण केले. हा चित्रपट बॉक्स ऑफिसवर अयशस्वी ठरला. त्यानंतर त्यांनी आणखी दोन चित्रपटांमध्ये काम केले, परंतु तेही यशस्वी होऊ शकले नाहीत. त्यांच्या कारकिर्दीत ‘आनंद और आनंद’, ‘कार थीफ’ आणि ‘मैं तेरे लिए’ यांसारख्या चित्रपटांचा समावेश होता. ‘मैं तेरे लिए’ मध्ये त्यांनी अभिनेत्री मीनाक्षी शेषाद्रीसोबत सह-कलाकार म्हणून काम केले. चित्रपटांमध्ये यश न मिळाल्याने, सुनील आनंद यांनी मुंबईत आपल्या वडिलांची निर्मिती कंपनी, नवकेतन फिल्म्स, सांभाळायला सुरुवात केली. २००१ मध्ये, त्यांनी ‘मास्टर’ या चित्रपटाद्वारे दिग्दर्शनात पदार्पणही केले. हा चित्रपट मार्शल आर्ट्सवर आधारित होता, परंतु तोदेखील बॉक्स ऑफिसवर यशस्वी ठरला नाही.
सुनील आनंद यांचा जन्म स्वित्झर्लंडमधील झुरिच येथे अभिनेते देव आनंद आणि अभिनेत्री कल्पना कार्तिक यांच्या पोटी झाला. त्यांनी अमेरिकेत शिक्षण घेतले. सुनील आनंद यांनी कधीही लग्न केले नाही. त्यांच्या कुटुंबात त्यांची आई, बहीण देविना आनंद आणि इतर कुटुंबीय आहेत.
