पाकिस्तानात सध्या विजेचे अत्यंत गंभीर संकट निर्माण झाले असून, विविध वीज प्रकल्पांमधील वीजनिर्मिती घटल्याने देशातील विजेचा तुटवडा तब्बल ४,००० मेगावॉटच्या पुढे गेला आहे. मागणी आणि पुरवठ्यातील ही दरी प्रचंड वाढल्यामुळे देशातील अनेक भागांमध्ये नागरिकांना वारंवार आणि प्रदीर्घ काळ अंधारात राहावे लागत आहे. नॅशनल ट्रान्समिशन अँड डिस्पेच कंपनीच्या सूत्रांच्या हवाल्याने ही माहिती समोर आली आहे.
या वीज संकटाचा सर्वाधिक फटका लाहोर आणि पंजाब प्रांतातील इतर भागांना बसत आहे. येथील नागरिकांना दररोज दोन ते तीन तासांच्या सक्तीच्या भारनियमनाचा सामना करावा लागत आहे. एकट्या लाहोर इलेक्ट्रिक सप्लाय कंपनीला १,२०० मेगावॉटहून अधिक विजेच्या तुटवड्याला सामोरे जावे लागत आहे. त्यातच वारंवार वीजपुरवठा खंडित होण्याच्या घटना घडत असल्याने, आधीच कोलमडलेल्या वीज व्यवस्थेवर मोठा ताण आला आहे. वीजनिर्मितीतील अडथळे आणि वितरण व्यवस्थेतील त्रुटींमुळे पाकिस्तानच्या संपूर्ण वीज पायाभूत सुविधांच्या विश्वासार्हतेवरच प्रश्नचिन्ह निर्माण झाले आहे.
इंधन टंचाईने या संकटात आणखी भर घातली आहे. आरएलएनजी इंधन वाहून नेणारे एक जहाज वेळेवर बंदरावर न पोहोचल्याने देशातील गॅस पुरवठ्याच्या अडचणी आणखी गंभीर होण्याची आणि वीजनिर्मितीवर आणखी मर्यादा येण्याची भीती व्यक्त केली जात आहे.
